DILI, 01 jullu 2021 (TATOLI)-–Primeiru Ministru (PM), Taur Matan Ruak, orienta ona Ministru Obra Públika (MOP), Salvador Eugênio dos Reis Pires, no Prezidente Konsellu Administrasaun Bee Timor-Leste, Empreza Públika (BTL, sigla portugés), Carlos Peloi dos Reis, atu solusiona polémika funsionáriu Diresaun Jerál Água no Saneamnetu hamutuk 196 ne’ebé la liu vaga rekrutamentu funsionáriu BTL, E.P.
Ministru Prezidénsia Konsellu Ministru, Fidelis Manuel Leite Magalhães, konsidera, estatutu BTL, E.P hanesan Empreza Públika, fó dalan foti desizaun autonomia rasik no la’ós ona direta hosi ministériu tutela, maibé Governu nafatin rona preokupasaun maluk sira ne’ebé lakon serbisu.
“Primeiru-Ministru orienta ona Ministru Obra Públika hamutuk ho BTL, E.P atu haree didi’ak kona-ba situasaun ida-ne’e hodi iha solusaun,” Ministru informa iha Palásiu Governu, kinta ne’e.
Notísia relevante: Polémika funsionáriu 196, Prezidente BTL, E.P prontu hatan iha PN
Tuir nia, Governu nota situasaun ne’e maibé haree ba kompeténsia MOP no BTL, E.P atu desizaun di’ak ba sidadaun sira.
“Ita hakarak saida de’it mak sira foti di’ak ba sidadaun sira, maibé Governu labele pronúnsia hodi la resepita kompeténsia legál ne’ebé sira iha,” nia afirma.
Antes ne’e, Prezidente Konsellu Administrasaun BTL,E.P, Carlos Peloi dos Reis, informa, nia parte prontu atu hatan iha Parlamentu Nasionál relasiona ho polémika funsionáriu hamutuk 196.
Jornalista : Florêncio Miranda Ximenes
Editora : Julia Chatarina
