DILI, 01 jullu 2021 (TATOLI)–Diretór Jerál Kooperasaun Dezenvolvimentu Institusionál hosi Ministériu Agrikultura no Peska (MAP), Cesar José da Cruz, hateten, parte ministériu sei tau prioridade hasa’e produtividade agrikultura.
“Iha tinan 2021, ita foka liu ba irrigasaun no oituan ba diresaun sira seluk, maibé tinan 2022 ita hanoin halo buat boot ba programa hanesan hasa’e produtividade, kualidade, exportasaun, rendimentu no haree ambiente ne’ebé liga ho ministériu seluk,” Diretór Jerál informa iha salaun MAP, Comoro, kinta ne’e.
Hasa’e produtividade, MAP sei kolabora ho Japan International Cooperation Agency (JICA) hodi haree kualidade produsaun hare.
Nia dehan, kona-ba orsamentu ne’ebé atu prevee iha programa, parte ministériu hamutuk ho diresaun sira hahú deskute inklui prioridade sira molok elabora proposta orsamentu.
“Ministériu Agrikultura iha tinan ne’e prevee millaun $31 resin, maibé ba orsamentu tinan oin kada diresaun sei deskute atu haree prioridade saida maka atu halo,” nia akresenta.
Jornalista : Natalino Costa
Editora : Julia Chatarina
