VIQUEQUE, 02 jullu 2021 (TATOLI)—Reprezentante família hosi suspeitu NSXP, Lamartinho Soares, husu deskulpa ba Estadu no povu portugés no timor-oan relasiona ho aktu sunu Bandeira Portugal hafoin asiste jogu UEFA EURO 2020.
“Ba Embaixada Portugal, ha’u reprezenta família, husu deskulpa tamba oan (labarik) sira joven akonpanã jogu no taru hosi Portugal, sira lakon mak sunu bandeira,” Reprezentante família informa ba Agência TATOLI, iha postu administrativu Uatucarbau, munisípiu Viqueque, sesta ne’e.
Notísia relevante: PNTL detein suspeitu sunu bandeira Portugal iha Uatucarbau
NSXP ho idade 19, sunu baindeira Portugal iha tuku 4:00 madrugada iha loron 28 juñu iha ninia rezidénsia Uatucarbau, hafoin asiste jogu entre ekipa Portugal lakon ho Bélgika ho eskore 0-1.
Tuir Lamartinho, rezultadu jogu halo NSXP la simu tanba hanesan adeptu hosi Portugal, maibé suspeitu kolabora ona ho parte kompetente hodi halo investigasaun, nune’e daudaun ne’e iha Polísia Nasionál Timor-Leste (PNTL) Eskuadra Uatucarbau.
“Hau nu’udar família, husu deskulpa ba Governu, Prezidente Parlamentu, Prezidente Repúblika, Francisco Guterres ‘Lu Olo’ no ba Primeiru-Ministru, Taur Matan Ruak, membru Governu no povu Timor-Leste tanba ema hotu akompaña,” nia akresenta.
Asaun sunu Bandeira Portugal halo ba vídio ho durasaun minutu 00:14, ne’ebé públika hosi suspeitu ho inisiál JMP ho idade 21, iha rede sosiál no sai virál.
“Aktu ida ne’e la hamate kooperasaun entre Portugal no Timor-Leste, ne’ebé kooperasaun nafatin metin ba oin, tanba ida-ne’e aktu hosi ema ida,” nia hatutan.
Jornalista : Natalino Belo
Editora : Julia Chatarina
