DILI, 02 jullu 2021 (TATOLI)—Koordenadór Gabinete Apoiu Sosiedade Sivíl (GASC, sigla portugés), Filipe da Costa, apresia ho serbisu monotorizasaun no rekomendasaun sosidade sivíl ne’ebé hatudu duni vontade iha prosesu.
“GASC haree bazeia ba rekomendasaun hosi organizasaun sosiedade sivíl ba Gabinete Primeiru-Ministru, liuliu rekomendasaun Fórum Organizasaun Naun Governamentál (FONGTIL) lubuk ida kona-ba prátika halo vasina di’ak. Ita kontente tanba iha melloramentu iha prosesu tratamentu implementasaun vasina iha fatin hotu, nune’e populasaun bele asesu di’ak liután,” Koordenadór GASC relata hafoin ramata reuniaun ho Primeiru-Ministru (PM), Taur Matan Ruak, iha Rezidénsia Farol, sesta ne’e.
Aleinde ne’e, sosiedade sivíl fó sujestaun fahe informasaun di’ak liután, ne’ebé PM adota no komunika ba ministériu relevante, hafoin númeru asesu vasina aumenta.
“Ida-ne’e tanba kontribuisaun hosi sosiedade sivíl kada semana sempre haruka ba Gabinete Primeiru-Ministru,” nia akresenta.
Biban ne’e, Koordenadór informa mós katak GASC iha alokasaun millaun $7 no hosi totál ne’e millaun $3,2 transfere ba organizasaun lubuk ida iha Timor-Leste no sira hala’o atividade lubuk ida.
Hanesan FONGTIL daudaun hala’o diálogu ho, halo monitorizasaun ba implementasaun vasina kontra COVID-19 iha fatin hotu.
Aleinde ne’e, Asosiasaun HAK halo monitorizasaun ba prizaun sira, nune’e mós fó treinamentu kona-ba implementasaun regra prevensaun COVID-19 iha fatin hotu-hotu.
GASC mós iha rede auditóriu sosiál ne’ebé hala’o nafatin monitorizasaun ba atividade báziku iha fatin-fatin, nune’e mós atividade sira ne’ebé la’o hodi dezenvolve ekonómiku baze hanesan iha área ortikultura no kooperativa kiik.
“Espera katak to’o tinan ne’e nia rohan, bainhira elabora ona rezultadu relatóriu hosi implementasaun atividade, ita bele haree oinsá setór sivíl ne’e kontribui ba objetivu Governu nian,” nia hatutan.
Jornalista : Antónia Gusmão
Editora : Julia Chatarina
