DILI, 02 jullu 2021 (TATOLI) – Universidade Nasionál Timor Lorosa’e (UNTL) sei reforsa kursu foun lima (5) iha área post-graduasaun.
Notísia Relevante : Afonso de Almeida, vise-reitór post-graduasaun
Área lima ne’ebé sai xave kompromisu Vise-Reitór foun asuntu post-Graduasaun no Peskiza, Afonso de Almeida nian, maka hanesan lingua Portugés, metodolojia peskiza, administrasaun, jestaun no lideransa. Ho alvu, hasa’e koñesimentu no abilidade lisensiadu no korpu dosente-sira hodi tama ba merkadu traballu.
“Ha’u hanoin atu halo bá tinan lima ne’e maka loke tan kursu foun lima iha area mestradu no doutoramentu. Maibé, ita sei haree uluk rekursu interna. Ita-nia dosente sira preparadu ona ka seidauk atu kontinua kursu ne’e bá oin labele mate,” Afonso de Almeida, hateten ba jornalista hafoin simu posse, sesta ne’e, iha salaun auditóriu, Liçeo, Francisco Machado, Dili.
Nia fundamenta katak kursu foun lima atu loke iha nivel post-graduasaun ne’e la presiza títulu (gelar), maibé sei atribui de’it ho diploma ka sertifikadu. Kursu ne’e destinadu bá lisensiadu ka dosente-sira ne’ebé seidauk iha koñesimentu di’ak iha área portugés, metodolojia peskiza, administrasaun, lideransa no jestaun.
Jornalista : Tomé Amado
Editór : Francisco Simões