DILI, 05 jullu 2021 (TATOLI)-Forum Organizasaun Naun Governamentál Timor-Leste (FONGTIL) observa katak implementasaun programa Cesta Bázika la kontribui másima ba programa rekuperasaun ekonomia rai-laran.
Notísia Relevante : Governu enserra distribuisaun Cesta Bázika fulan ne’e
“Atu rekupera ekonomia ne’e agora ita-nia ekonomia dependénsia ba fundu mai hosi mina-rai, dependénsia ba imputasaun no ekonómia ida ne’ebé setór privadu dependénsia ba setór públiku katak emprezáriu sira depende ba Estadu ninia projetu, entaun, ita ko’alia kontestu rekuperasaun ekonomia ho programa Cesta Bázika ne’e nia la kontribui másimu ba programa rekuperasaun ekonomia tanba tuir lei Cesta Bázika hateten katak pakote sira ne’ebé tama iha bote laran ne’e tenke pakote ijiene, no ai-han sira ne’ebé iha nutrisaun, maibé sasán sira ne’e kuaze hosi importasaun,” Diretór Ezekutivu FONGTIL, Daniel Santos do Carmo, haktuir hodi responde Agência Tatoli iha nia knaar fatin, Caicoli, Dili, segunda ne’e.
Nia haree katak sasán sira importasaun iha bote laran, hanesan sabaun, pastadente, rinso, mina bimoli, susu-been no hand sanitizer sira ne’e tenke kompras hosi rai-liur, tanba ne’e osan sorin tenke sulin tiha ba nasaun viziñu hanesan rai produsaun.
“Hosi sasán importadór sira ne’ebé tau hamutuk hotu iha bote-laran ne’e, ami kalkula katak 75% fundu ba Cesta Bázika rekupera rai seluk nia ekonomia,” Daniel Santo do Carmo afirma tan.
Durante periodu implementasaun programa Cesta Bázika, FONGTIL mós halo akompañamentu no haree besik liu katak iha bote-laran ne’e sasán barak liu hosi importasaun, nune’e sasán ne’ebé ninia distribuisaun kuantidade la hanesan ho buat ne’ebé Governu dehan katak kada ema ida hetan sasán ho folin $50.00, maibé realidade hatudu terrenu sasán folin la to’o $50.00.
FONGTIL mós deskobre katak tanba distánsia mobilizasaun hosi Dili ba munisípiu dook, maka fó espasu ba empreza fornesedór-sira halimar ho sasán nia presu. Katak tuir loloos ema ida iha direitu ba simu sasán ho kuantidade osan $50,00 maibé realidade barak menus hosi $50,00 kada ema.
“Buat ne’ebé ami nota katak kompañia sira kuaze manan liu 10% hosi programa Cesta Báziku, ezemplu pastadente ida, iha merkadu $0.50 centavos maibé kompañia halo tiha ida fornese ba Governu tau fali presu $1.50 centavos, ida ne’e nia manan liu tiha 10%, entaun ida ne’e krime, ne’ebé ba situasaun sira ne’e ita ko’alia ona Komisaun Anti Korrupsaun (CAC sigla-portugés), Inspesaun Fiskalizasaun Atividade Ekonómika Sanitária no Alimentár (AIFAESA), Servisu Rejistu no Verifikasaun Emprezariál, Institutu Públiku (SERVE.IP) atu haree ida ne’e,” Daniel do Carmo tenik.
Nia dehan, relatóriu ne’ebé Governu liuhosi Ministériu Koordenadór Asuntu Ekonómika (MKAE) hatudu katak 79% populasaun Timor-Leste sai ona benefísiu ba Cesta Bázika ne’e automatikamente dadus refere hanesan ho relatóriu FONGTIL nian, tanba monitorizasaun ne’ebé FONGTIL halo ba iha suku sira hatudu mós katak maioria abitante-sira iha suku laran simu hotu ona Cesta Bázika.
“Relatóriu ne’ebé ami-nia membru sira relata mai hanesan ho dadus ne’ebé Governu fó sai maibé buat ne’ebé ita diskute mak kualidade no kuantidade sasán tuir osan ne’ebé Governu aprova. Entaun relatóriu ida hosi Munisípiu ne’ebé tama sasán folin ne’ebé la tuir hanesan mak Bobonaro, Lautem, Viqueque no Ermera sira relata katak sasán ne’ebé iha bote la tuir ho sasán ne’ebé mak iha, no kompañia sira ko’a, ezemplu família uma-kain ida ema na’in hitu sira ko’a sai tiha na’in rua,” Daniel do Carmo tenik.
Implikasaun pozitivu hosi ba povu hosi programa Cesta Bázika motiva agrikultór sira prodús ai-hán no sira mós hetan rendimentu.
Hosi biban seluk, Agência Tatoli mós halo entrevista konfirmasaun ho Xefe Suku Motael, Dili, Administradór Munisípiu Bobonaro ho Xefe Suku Ogues ho Xefe Suku Debos.
Xefe Suku Motael, Luis António Candido Gusmão, hateten, komunidade suku Motael hotu-hotu simu ona Cesta Bázika no daudaun ne’e reklamante hamutuk 1.000-resin mak seidauk simu.
Iha Suku Moatel rasik mós simu reklamasaun katak sasán sira fornese iha Cesta Bázika nia kuantidade la to’o tuir osan $50,00.
Seluk fali maka Autoridade sira Motael identifika mós sasán importasaun maka domina iha Cesta Bázika.
Benefisiáriu 70-resin iha Ogues ho Debos seidauk simu
Abitante hosi Suku Ogues ho Suku Debos hamutuk na’in-70 resin maka seidauk simu Cesta Bázika.
Relatóriu hosi ruku rua refere katak, iha suku Ogues benefisiáriu 17 maka seidauk simu no iha Suku Debos na’in-50-resin maka seidauk simu sira-nai direitu Cesta Bázika.
“Durante implementa programa sesta bázika, Ami la simu reklamasaun hosi komunidade sira tanba kompañia distribuidór fó sasán nia kuantidade kada ema hetan $50.00,” Xefe Suku Ogues Faustino Cardoso, hateten iha sede Suku Ogues, Munisípiu Covalima.
Populasaun iha Suku Ogues hamutuk 2.599 simu ona sasán Cesta Bázika no hela de’it na’in-17. Nune’e mós Xefe Suku Debos, Agustinho da Silva hateten, abitante iha Suku Debos kontente ho polítika Governu ne’ebé implementa programa Cesta Bázika
Maske iha Suku Debos, benefisiáriu 50-resin mak seidauk simu Cesta Bázika, maibé autoridade lokál halo ona koordenasaun atu rezolve problema ne’e
Administradór Munisípiu Covalima, Francisco de Andrade, mós hateten abitante Munisípiu Covalima hosi Postu Administrativu hitu (7), Suku 30 ho aldeia 100-resin, maioria simu hotu ona sasán Cesta Bázika
Administradór Munisípiu Covalima ho nia ekipa mós nota katak sasán barak iha Cesta Bázika la kombina ho folin osan $50,00 ba kada benefisiáriu.
Mariano de Jesus Martins nu’udar benefisiáriu fó sasin katak programa Cesta Bázika ne’e ajuda tebes nia ho nia família iha situasaun pandemia COVID-19.
“Sasán ne’ebé ha’u simu tuir duni kompromisu Governu nian kada ema ida hetan sasán ho folin $50,00, tanba momentu ami simu ne’e iha uma-laran ami na’in tolu ne’ebé ami simu sasán ho folin $150,00. Ajuda ona ami nia nesesidade iha situasaun pandemia COVID-19,” nia hateten.
Jornalista : Arminda Fonseca/Celestina Teles
Editór : Francisco Simões
