DILI, 05 jullu 2021 (TATOLI)—Diretór Fundasaun Parseriu Dezenvolvimentu Timor-Leste (FPDTL), Sancho Belo do Rego, informa nia parte hein despaixu ofisiál hosi Ministériu Edukasaun, Juventude no Desportu (MEJD) hafoin reativa atividade formasaun iha fundasaun refere tanba munisípiu Dili aplika hela serka sanitária.
“Ha’u hanoin reativa formasaun depende ba desizaun hosi Governu, liuliu hosi Ministériu Edukasaun Juventude no Desportu (MEJD), kuandu hatún despaixu entaun bele reativa fali atividade formasaun ne’e,” Sancho Belo do Rego, hateten ba Agência TATOLI, iha nia kna’ar-fatin, Palapacoso, Dili, segunda ne’e.
Nia haktuir, sira hahú ona formasaun iha fulan-janeiru to’o marsu 2021 maibé implementasaun deklarasaun estadu emerjénsia nune’e Governu introdús tán medida serka sanitária no konfinamentu obrigatóriu entaun supende tiha atividade refere.
Diretór FPDTL ne’e fó-sai katak, formandu ne’ebé tuir formasaun hamutuk na’in 220 iha área lima kompostu hosi lian portugues, Inglés, komputadór, jornalismu, administrasaun no finansa.
Objetivu loke formasaun ne’e, atu fó kapasitasaun ba juventude, komunidade, no labarik sira partisipa iha formasaun naun-formál ne’e, tanba ezisténsia organizasaun ida la’ós atu buka lukru hosi estudante sira maibé organizasaun ne’e ho komitmentu hakarak ajuda.
“Ami-nia observasaun iha Dili laran, kuaze kursu hotu-hotu nia kustu bootliu, entaun ho inisiativa hosi Konsellu Ezekutivu no Konsellu Board fó hanoin hamutuk deside fó formasaun ba públiku atubele fasilita joventude sira,” nia dehan.
Totál formandu ne’ebé tuir formasaun iha fundasaun refere hahú hosi ezisténsia to’o agora hamutuk ema na’in 700-resin. Hosi númeru ne’e ema na’in 10-resin mak hetan ona serbisu iha instituisaun estadu no instituisaun privadu sira.
Nia dehan, formandu ne’ebé aplika iha Fundasaun Parseriu Desenvolvimentu Timor-Leste (FPDTL), loke ba públiku, maibé fó prioridade ba juventude sira-ne’ebé abandona sira-nia estudu.
Fundasaun Parseriu Desenvolvimentu Timor-Leste (FPDTL), estabelese iha loron 5, fulan-abríl 2017, ne’ebé funda hosi ema na’in-haat (4) mak hanesan, João do Carmo, Manuel Simão, Paulo Soares no Sancho Belo do Rego.
Jornalista : Nelia Fernandes
Editór : Cancio Ximenes
