COVALIMA, 06 jullu 2021 (TATOLI) –Eletrisidade Timor-Leste, Empreza Públiku (EDTL,E.P) sei dada eletrisidade ba komunidade iha Suku Laktos, Mape no Usukai iha Munisípiu Covalima.
“Ami mai ko’alia ho administradór kona-bá atu implementa projetu rua (2) iha munisípiu Covalima hodi fornese ahi ba komunidade suku tolu iha Covalima. Tanba ne’e, ami koordena no husu apoiu administradór nian,” Komisáriu Ezekutivu EDTL, E.P, Latino Jerónimo informa ba jornalista sira iha Administrasaun Covalima, tersa ne’e.
Atu atinje implementasaun projetu ne’e, maka iha tempu badak EDTL,E.P sei halo levantamentu dadus hodi submete ba iha BoQ atu nune’e iha setembru ka outubru nia laran ,sei halo lansamentu ba projetu fornesimentu eletrisidade ba suku sira ne’ebé seidauk asesu eletrisidade.
Administradór Munisípiu Covalima, Francisco de Andrade hateten, EDTL, E.P halo observasaun hotu ona no tinan ne’e sei dada ahi ba komunidade ne’ebé seidauk asesu eletrisidade.
Jornalista : Celestina Teles
Editór : Francisco Simões
