MANUFAHI, 06 jullu 2021 (TATOLI)-–Fundasaun Aloka liuhosi programa Suku Hadomi Inan ho Oan (SHIO) halo prátika tein hahán nutritivu ba inan no oan sira iha suku Letefoho, postu administrativu Same, munisípiu Manufahi.
Koordenadór Gabinete Apoia Sosiedade Sivíl (GASC, sigla portugés), Filipe da Costa, haktuir, tinan kotuk simu proposta hosi Fundasaun Alola, ne’ebé hakarak kontinua programa SHIO iha Manufahi ho objetivu hakarak tau-matan ba inan no bebé sira no hafoin analiza, GASC deside apoia osan hamutuk $51.000.
“Inan no oan sira hanesan fundasaun importante país nian, tanba hosi inan mak iha oan no oan sira mak futuru ba nasaun,” Koordenadór GASC hateten liuhosi ninia intervensaun durante seremónia prátika tein haháan nutritivu iha suku Letefoho, tersa ne’e.
Nia refere ba dadus mundiál, Timor-Leste iha segundu lugar má nutrisaun no nota katak iha Manufahi ai-han ho nutrisaun di’ak, maibé iha munisípiu ne’e sai fatin ne’ebé rejista labarik barak mak má nutrisaun. Tanba ne’e, ho programa ne’e bele aumenta koñesimentu inan sira oinsá tein hahán ho di’ak ba oan tanba inan sira tenke kuidadu-an durante isin-rua no partu.
Koordenadór husu ba partisipante sira atu halo tuir formadór sira no tenke halo prátika iha uma, nune’e bele ajuda Governu sai hosi problema má nutrisaun.
Iha fatin hanesan, Jerente programa SHIO Fundasaun Alola, Jesuina Maria Boavida Ximenes, dehan objetivu atividade ne’e atu demonstra tein ai-han ho nutrisaun ba inan isin–rua no bebé ne’ebé foin moris, bebé fulan-neen to’o sia no fulan-sia to’o tinan-rua.
Antes ne’e, atividade hanesan realiza ona iha suku tolu seluk iha Manufahi no atividade sira sei realiza kada fulan maibé halo rotasaun iha suku sira.
Tuir dadus hosi Fundasaun Alola, hahú fulan-janeiru 2021 to’o agora deteta labarik hamutuk 18 afeta má nutrisaun moderadu iha suku Holarua, Betano, Daisua no Letefoho no hosi númeru ne’e, na’in-10 halo tratamentu iha Sentru Saúde Manufahi no ualu seluk tanba identifika foun maka sei halo akompañamentu.
“Hahán iha oin tolu hanesan proteina, karbohidrat no mineral. Ami enkoraja atu konsume barak liu ai-han proteina hosi animál no ai-horis. Hosi aihoris hanesan fore-mungu, kote no seluk tan no hosi animál mak manu-tolun no na’a,” nia esplika.
Responsável ba programa ne’e husu inan sira halo tuir no prátika tein iha uma, nune’e bele redús númeru má nutrisaun iha Timor-Leste.
Iha biban hanesan, Partisipante iha programa, Maria Angêla Quintão da Costa, haksolok ho atividade ne’e tanba bele fó hanoin ba inan sira oinsá bele tein hahán di’ak ba oan sira.
“Fó hanoin ba inan sira atu tein hahán lokál fó ba oan sira, tanba durante ne’e tein hela maibé konforme de’it hakarak, maibé hosi informasaun sira ne’ebé ami simu, bele ajuda atu tein hahán di’ak,” nia dehan.
Nune’e, Maria Angêla promete sei prátika saida mak hetan hodi tein hahán ho di’ak iha uma no fó ba oan sira.
Biban ne’e, Fundasaun Aloka fahe mós pakote maternidade ba inan no oan hamutuk na’in-15, ho razaun bainhira inan sira partu bele iha fasilidade hanesan iha Sentru Saúde sira.
Atividade ne’e hetan partisipasaun másimu hosi inan no bebé iha suku Letefoho no hafoin halo demonstrasaun, hahán sira fó han ba labarik no inan sira.
Jornalista : Antónia Gusmão
Editora : Julia Chatarina
