DILI, 06 jullu 2021 (TATOLI)–Governu liuhosi Ministériu Petróleu no Minerál (MPM) no Autoridade Nasionál Petróleu no Minerál (ANPM), iha tersa ne’e atribui ona lisensa ambientál ba empreza Timor Resources PTY, Ltd hodi bele halo perfurasaun mina-matan iha rai-maran Kosta Súl.
Atribuisaun lisensa ambientál ba empreza austrálianu ne’e atu halo perfurasaun dahuluk iha área onshore exploration drilling conctract iha área PSC TL-OT-17-08.
“Atribui lisensa ambientál ne’e marka pasu importante tebes iha jornada indústria petróleu iha Timor-Leste, tanba foin dahuluk ita fó lisensa ho kategoria A ba empreza ida atu halo perfurasaun iha rai-maran,” Prezidente ANPM, Florentino Mateus Soares Ferreira, informa iha salaun Suai Room Timor-Plaza, Dili, tersa ne’e.
Desizaun atribuisaun ne’e, liuhosi ekipa alta autoridade avaliasaun impaktu ambientál kompostu hosi liña ministeriál hanesan, MPM, Ministériu Obra Públika (MOP), Ministériu Agrikultura no Peska (MAP), Ministériu Administrasaun Estatál (MAE), Sekretaria Estadu Ambiente (SEA) ne’ebé antes ne’e halo ona avaliasaun no estudu tékniku ambientál.
“Ita garante laiha impaktu ambientál tanba iha lisensa ambentál ne’e iha planu atu halo jestaun ambiente, nune’e bele jere impaktu ambientál ho di’ak, tanba ne’e laiha impaktu ba sosiedade no bele proteje saúde, ambientál no sosiál ekonómiku” nia akresenta.
Timor Resoruces ho bloku rua no Timor Gás no Petróleu, Empreza Públika (Timor GAP, E.P) nia bloku ida iha Covalima no Manufahi, sai hanesan teste ida mai Timor Leste atubele dezenvolve indústria petrolífera iha rai-maran atu benefisia ein termu ekonómiku ba Estadu no povu.
Daudaun ne’e, Timor Resources fó servisu ona ba timor-oan sira iha faze explorasaun inklui kapasita atu koñese iha área perfurasaun no indústria petróleu.
“Ita kuandu iha ona deskobrementu, ita sei tama faze dezenvolvimentu atu halo instalasaun armanajeinamentu ne’ebé sei fó mós kampu traballu ba timor-oan sira,” nia hatutan.
Nune’e, ANPM ho esperansa perfurasaun mina-matan dahuluk iha rai-maran ho indústria bele kontribui ba dezenvovlimentu ekonómiku sustentável.
Notísia relevante: Setembru, Timor Resources Hahú Installa Mákina Perfurasaun Mina-Matan iha Kosta Súl
“Ita espera katak ho lisensa ambientál ne’e, Timor Resources bele halo preparasaun, nune’e iha setembru tinan ne’e bele halo perfurasaun dahuluk ne’ebé garante laiha impkatu ambientál no saúde ba populasaun,” nia informa.
Empreza hahú instala mákina perfurasaun
Iha biban hanesan, Reprezentante Jestór Empreza Timor Resources, Filomeno de Andrade Tilman, dehan hafoin simu lisensa ambientál, tékniku sira hahú preparasaun no instalasaun.
“Ami-nia mákina sira iha ona Suai no monta ona ne’ebé hein kontratór na’in-haat hosi Indonézia, Austrália no Estadu Unidu Amérika (EUA) atu lori ekipamentu kontrolu atu hahú halo perfurasaun,” nia tenik.
Tuir planu, iha 21 setembru tinan ne’e, Timor Resources hahú halo ona dahuluk ba perfurasaun iha área Matai no perfurasaun daruak iha área Camasa, Suai.
“Ami hakarak uza rekursu umanu timor-oan hanesan iha prosesu estudu sízmiku 97% iha Suai no Manufahi timor-oan 98% mak servisu, maibé faze perfurasaun defísil no perigu, ne’ebé ita tenke haree ema sira ne’ebé iha esperénsia mak halo servisu inklui halo kapasitasaun ba timor-oan”, nia hatutan.
Ho lisensa ne’e, Timor Resources prontu atu halo perfurasaun faze dahuluk iha rai-maran, hodi garante projete ambientál, saúde, sosiál hodi fó benefísiu ekónomiku sustentável ba Estadu Timor-Leste.
Iha tinan 2017, hahú halo peskiza jeolójiku no estudu iha bloku lima no iha outubru 2018 sei rezaliza teste sízmiku iha bloku A, enkuantu iha bloku C iha zona Betano (entre Alas no Hatudu) ho teste vibroseis.
Nune’e, iha bloku A ne’ebé ida-idak hosi perfurasaun tolu iha shllow-field to’o metru 2.000 ho ninia kalkulasaun kustu bele to’o milaun $35.
Enkuantu, bloku B haruka ona ba Timor GAP, E.P iha Onshore Block, ne’ebé hanesan subsidiáriu.
Jornalista : Florêncio Miranda Ximenes
Editora : Julia Chatarina
