iklan

DILI, EDUKASAUN, NASIONÁL

MESSK inaugura edifísiu foun Fakuldade Medisina UNTL

MESSK inaugura edifísiu foun Fakuldade Medisina UNTL

MESSK Longuinhos dos Santos, ko'a fita hodi inaugura edifísiu Fakuldade Medisina Siénsia Saúde UNTL iha Caicoli, Dili, tersa (06/07). Imajen Tatoli/Francisco Sony

DILI, 06 jullu 2021 (TATOLI) – Ministru Ensinu Superiór, Siénsia no Kultura (MESSK), Longuinhos dos Santos, akompaña hosi Reitór Universidade Nasionál Timor Lorosa’e (UNTL), João Soares Martins, ho sivita akadémika UNTL nian, tersa ne’e, inaugura ona    edifísiu foun  Fakuldade Medisina, Siénsia Saúde.

Edifísiu foun ho medida andar tolu (3), kompostu hosi aula 18 ho fasilidade sanitaria 18 ba feto no mane ne’e  konstrui hosi kompañia kontraktor Linier and Algiseng Unipesoál, Lda, ho nia orsamentu ba projetu konstrusaun $678.000,00 ho durasaun servisu tinan rua-resin.

Iha serimónia lansamentu ne’e, Ministru Longuinhos dos Santos, esplika funsionamentu edifísiu foun Fakuldade Medisina Siénsia Saúde UNTL ne’e atu kumpre ninia misaun hodi prepara rekursu umanu ida kualidade iha futuru. Tan ne’e  MESSK hakarak felisita bá konkretizasaun obra foun ida ne’e.

Ministru ne’e afirma katak dezafiu ida ligadu ho fasilidade iha edifísiu foun ne’e tenke iha instalasaun ida di’ak liu tan  tanba edifísiu foun ne’e iha karakterizasaun adekuadu.

“Ha’u apela bá ita hotu katak estadu investe ona iha edifísiu foun ne’e presiza ita-boot sira-nia kolaborasaun. Ha’u apela bá estudante-sira presiza kuida no uza edifísiu foun ne’e ho didi’ak atu bele asegura nafatin kualidade ida di’ak iha futuru,” Ministru Longuinhos dos Santos hateten.

Reitór UNTL, João Soares Martins, hatutan konstrusaun edifísiu foun ne’e fatin ida kapás tebes ho kualidade exelente iha sékulu 21. Edifísiu ida-ne’e atu fó mahon di’ak bá estudante-sira atu estuda hodi dezenvolve an di’ak liután.

“Ha’u husu bá estudante sira katak fatin foun ne’e atu motiva imi atu bele hakas-an estuda atu sai jerasaun foun ida kualidade iha futuru,” João Soares Martins hateten.

Nia mós dehan edifísiu Fakuldade Siénsia Saúde ne’e na’in mak UNTL, ne’ebé husu bá dekanu Fakuldade Medisina Siénsia Saúde atu fó mós oportunidade bá fakuldade sira seluk atu utiliza.

Diretór Kompañia Linier and Algiseng Unp. Lda, Agustinho Alves, klarifika katak edifísiu foun ne’e ninia prosesu obra hahú iha 2019 komesa sukat, maibé konstrusaun fíziku loloos hahú iha janeiru 2020.

Jornalista : Tomé Amado

Editór       : Francisco Simões

iklan
iklan

Leave a Reply

iklan
error: Content is protected !!