DILI, 06 jullu 2021 (TATOLI)—Ministériu Saúde (MS) sei responsabiliza komemorasaun loron nasionál Funsaun Públika tinan ne’e ba dala-VII ho tema ‘ámbitu saudável ho promosaun hasoru COVID-19 nu’udar dalan ba nova normalizasaun iha atendimentu públiku’, iha loron 15 jullu.
Tanba ne’e, Ministra Saúde, Odete Maria Freitas Belo, hamutuk ho Prezidente Komisaun Funsaun Públika, Faustino Cardoso Gomes, hasoru malu ho Primeiru-Ministru (PM), Taur Matan Ruak, hodi konvida partisipa no fó mensajen ruma iha loron nasionál ne’e.
“Ami mai halo reuniaun ho Primeiru-Ministru atu husu disponibilidade marka prezensa iha loron 15 jullu hamutuk ho ami no funsionáriu sira hodi fó lia-menon no motiva sira atu servisu maka’as iha ámbitu luta kontra COVID-19,” Ministra Saúde, hateten hafoin ramata reuniaun ho Xefe Governu, iha Rezidénsia Farol, Dili, tersa ne’e.
Nune’e, PM hatudu disponibilidade partisipa iha loron importante ba Funsionáriu Públiku sira inklui loron nasionál saúde.
“Ami iha esperansa ho prezensa líder nasionál sira bele fó motivasaun ba funsionáriu hotu, liuliu pesoál saúde sira atu kontinua luta hasoru COVID-19,” nia akresenta.
Governante ne’e konsidera, fulan-jullu ne’e hanesan loron importante ba MS no Funsionáriu Públiku iha instituisaun Estadu tomak.
Governu Timor-Leste kontinua fó rekoñesimentu ba ajente administrasaun públiku sira nia dezempeñu hodi kontribui ba dezenvovlimentu nasionál.
Biban ne’e, Ministra sente orgullu ba dezepeñu servisu Funsionáriu Públiku sira ba populasaun iha ámbitu COVID-19.
Komemorasaun loron nasionál ne’e sei la halo atividade, maibé koordena de’it ho MS atu lansa programa konsultasaun no vasina ba sidadaun sira iha sentru saúde sira.
Jornalista : Florêncio Miranda Ximenes
Editora : Julia Chatarina
