OÉ-CUSSE, 06 Jullu 2021 (TATOLI)—Parlamentu Foinsa’e Rejiaun Administrativa Espesiál Oé-Cusse Ambeno (RAEOA) períodu dahaat ne’e, implementa ona programa rua ba eskola haat mak formasaun Life Skill Basic Education (LSBE) no sensibilizasaun kona-ba COVID-19 ba estudante sira.
Reprezentante Parlamentu Foinsa’e RAEOA, Rozalia Nahas, hateten hosi programa no atividade hirak ne’e konsege identifika labarik feto sira iha RAEOA barak mak hakotu eskola tanba inan-aman sira obriga atu kaben sedu ka hola mane lalais.
“Bainhira ami halo sensibilizasaun iha eskola, ami identifika problema prinsipál ne’ebé mosu iha eskola ne’e, labarik feto barak mak eskola paradu tanba kaben sedu maske idade sei kiik hela. Problema ne’ebé eskola sira hasoru mak labarik feto barak sai hosi eskola tanba kaben sedu,” Rozalia Nahas informa ba Agênsia Tatoli iha nia servisu fatin, Centru Juventude Rejionál Oé-Cusse, tersa ne’e.
Atu rezolve problema ne’e, membru Paralmentu Foinsa’e sira halo ona aproximasaun no enkoraja inan-aman sira esplikasaun kona-ba impaktu kaben sedu ne’e sei estraga labarik feto sira-nia futuru, liu-liu fó risku boot ba labarik feto sira-nia saúde iha loron aban.
Nune’e mós, liuhosi semináriu loron ida, sira enkoraja labarik feto sira-ne’ebé eskola iha Ensinu Báziku Central (EBC) no Ensinu Báziku Filial (EBF) atu kontinua eskola hanesan estudante ida-ne’ebé sai Timor-Leste nia futuru.
“Ami kontinua halo semináriu loron ida ba estudante sira hodi uza matéria Life Skill Basic (SLB) nian, atu enkoraja ita-nia estudante sira iha EBC no EBF oinsá kontinua hala’o kna’ar nu’udar estudante ida no sai futuru nasaun nian,” nia dehan.
Kona-ba labarik feto kaben sedu iha RAEOA ne’e, nia dehan, reprezentante membru Parlamentu Foinsa’e na’in-ualu (8) halo ona reuniaun no identifika asuntu labarik feto kaben sedu ne’e tau iha ajenda, hanesan problema sosiál ne’ebé sei aprezenta iha plenária nasionál iha fulan-agustu be mai.
“Problema barak mak durante ne’e ami identifika. Ami membru Parlamentu Foinsa’e iha Oé-Cusse hamutuk na’in-ualu (8) ne’e halo ona reuniaun no tau ona iha ajenda. Nune’e, iha fulan-agustu, karik iha plenária iha nasionál ami sei levanta isu no problema sosiál ne’ebé akontese iha Oé-Cusse, nune’e bele rekomenda ba parte relevante hodi tau iha konsiderasaun,” nia dehan.
Problema seluk ne’ebé sira identifika mak mak materiál ba desportu nian sei menus no transferénsia profesór ba-mai ne’e afeta ba estudante balun sai abandonadu.
“Iha Ensinu Báziku Filiak Boboloa, estudante preokupa tanba edifisiu mós laiha no espasu atu hala’o prosesu aprendizajen mós laiha,” nia hateten.
Parlamentu Foinsa’e liu-liu iha sub-rejiaun Pante Makasar Vila hala’o ona programa edukasuan sívika iha eskola haat (4) mak Eskola Tékniku Agríkultura Rejionál Oé-Cusse (ETARO) ne’e fó formasaun kona-bá Life Skill Basic Education (LSBE) hanesan life skiil peace education, Eskola CAFÉ Oé-Cusse no identifika problema iha Eskola Báziku Filiál Boboloa halo edukasaun sívika, no iha EBF Oélcaem inklui populasaun suku Taiboko nian foti dadus kona-ba problema prinsipál ne’ebé juventude sira hasoru.
“Ami orgullu hasoru joventude sira no sira hato’o pergunta barak kona-ba problema ne’ebé akontese iha eskola. Ami iha oportunidade di’ak motiva ho materia LSBE nian atu oinsá bele koñese liutan atividade moris no abilidade moris nian,” nia dehan.
Parlamentu Foinsa’e RAEOA servisu hamutuk ho Centro Juventude Rejionál sira hala’o programa komponente lima (5) mak hanesan edukasaun sívika ba juventude, juventude ho saúde, juventude partisipasaun síviku, empregu, no empregabilidade (kemampuan kerja).
“Durante ne’e ami hala’o programa edukasaun sívika mak edukasaun sívika ba juventude no juventude ba saúde liuliu kona-ba sensilibilzasaun COVID-19 nian. Iha área seluk seidauk hala’o tanba foin dadauk estadu emerjénsia no serka sanitária,” Rozalia Nahas hateten.
Aleinde ne’e, membru Parlamentu Foinsa’e servisu hamutuk ho Centro Juventude sira iha Rejiaun Oé-Cusse hodi komemora loron istóriku 12 Novembru, 28 Novembru, 20 Maiu no seluktan, hodi kria animasaun ba estudante sira iha loron boot sira-ne’e.
Diretór Centro Juventude Rejiaun Oé-Cusse, Deonizio Taek, hateten kooperasaun entre Centro Juventude ho membru Parlamentu Foinsa’e iha kooperasaun di’ak ba asuntu juventude nian.
“Ami nia koopersaun ho membru Parlamentu Foinsa’e iha RAEOA durante ne’e la’o di’ak. Ami sempre involve sira iha atividade barak, hanesan programa Empredorizmu mós sira enkaixa iha ekipa avaliasaun ba proposta ne’ebé mak juventude hatama,” nia dehan.
Entretantu totál membru Parlamentu Foinsa’e iha RAEOA hamutuk ema na’in-ualu (8), kompostu hosi feto na’in haat (4) no mane na’in haat (4), kompostu hosi sub-rejiaun Oésilo na’in-rua (2), sub-rejiaun Pasabe na’in-rua (2), sub-rejiaun Nitibe na’’in-rua (2), sub-rejiaun Pante Makasar na’in-rua (2).
Membru Parlamentu Foinsa’e ne’ebé reprezenta RAEOA mak hosi sub-rejiaun Pante Makasar Rozalia Nahas no Tito Jenizio Teme, hosi sub-rejiaun Nitibe mak Paulo Patricio Name no Linda Maria Seno, hosi sub-rejiaun Oésilo mak Agusta Maria De Fátima Ase no Ozorio Bobo Caet, no hosi sub-rejiaun Pasabe mak Bendito Carlos Reinaldo Antonio Molo no Nanria Ageda Sila.
Jornalista : Abilio Elo Nini
Editór : Cancio Ximenes
