DILI, 07 jullu 2021 (2021)–Prezidente Konsellu Administrasaun Bee Timor-Leste, Empreza Públiku (BTL, E.P), Carlos Peloi dos Reis, hateten, empreza estatál ne’e laiha kompeténsia atu ezonera funsionáriu Diresaun Jerál Água no Saneamentu (DGAS, sigla portugés) hamutuk 196.
“Ita laiha intensaun no laiha kompeténsia atu ezonera funsionáriu hirak ne’ebé la’ós ita-nia funsionáriu tanba insitituisaun ida nia lideransa labele ba ezonera fali institusaun seluk nia funsionáriu,” Prezidente BTL, E.P hateten iha Palásiu Governu, kuarta ne’e.
Nia hato’o kestaun ne’e relasiona ho polémika funsionáriu DGAS hamutuk 196, ne’ebé la liu vaga rekrutamentu funsionáriu BTL, E.P, tanba ne’e kandidatu sira sente ezoneradu no abandonadu.
Dirijente ne’e esklarese, nia parte loke rekrutamentu ne’e ho baze ba regra tanba nu’udar insituisaun foun no lei la fó autorizasaun ba BTL,E.P atu halo transferénsia outomátika funsionáriu DGAS ba funsionáriu empreza estatál.
“Lei só dehan funsionáriu foun ba empreza estatál tenke liuhosi rektutamentu aberta, entaun ita la halo ezonerasaun ba maluk sira maibé sira la liu prosesu selesaun,” nia akresenta.
Notísia relevante: PM husu MOP-BTL, E.P solusiona polémika funsionáriu 196
Prosesu rekrutamentu iha kritériu no iha ekipa juri atu avalia aplikante funsionáriu DGAS no dokumentu liuhosi teste eskrita no intervista, hafoin avalia hodi anunsia rezultadu, nune’e, funsionáriu 196 ne’e la pasa selesaun.
Maibé funsionáriu 196 tuir regra funsaun públika, Ministériu Obra Públika (MOP) maka buka destaka sira ba insitituisaun Estadu seluk, tanba antes ne’e DGAS hanesan diresaun ida iha MOP hafoin transforma sai BTL, E.P.
“Normalmente sira-nia estatutu hanesan funsionáriu públiku la lakon tanba kada fulan kontinua simu saláriu mensál, maibé fatin serbisu mak buka dalan atu destaka ba instituisaun Estadu seluk,” nia esplika.
Komisaun instaladóra kompostu hosi Eis Diretór Jerál Água no Saneamentu inklui reprezentante Komisaun Funsaun Públika nian halo ona sosializasaun ba funsionáriu DGAS no kontratadu sira kona-ba prosesu rekrutamentu ba funsionáriu empreza estatál foun.
“Atu ami labele kontra lei traballu nian, katak ita kuandu hapara ema mínimu fulan-ida antes ita fó hatene ona, maibé kazu ida-ne’e ita halo no fó hatene ona fulan-neen antes,” nia hatutan.
Iha prosesu sosilaizasaun ne’e, BTL, E.P mós rekomenda ba Ministru Obra Públika, Salvador Eugênio Soares dos Reis Pires, atu estende funsionáriu kontratadu iha DGAS nian kontratu hahú hosi janeiru to’o juñu.
“Ita-nia lei normalmente kuandu kontratu hotu, entaun hotu duni, maski ita halo esforsu pasa informasaun atu sira mai tuir rekrutamentu, maibé la pasa ne’e kestaun ita iha regra no ekipa juri mak halo avaliasaun,” nia subliña.
Jornalista : Florêncio Miranda Ximenes
Editora : Julia Chatarina
