DILI, 06 jullu 2021 (TATOLI)—Diretór Sentru Formasaun Haburas Dezenvolve Talentu (HADEZTA), Franciso de Araujo, hateten sentru ne’e sei reativa formasaun bainhira sidade Díli livre ona hosi COVID-19.
“Ami seidauk bele reativa tanba sei haree situasaun. Ita hatene Governu sempre aumenta serka sanitária iha munisípiu Díli, entaun ita labele halo buat ida. Bainhira Governu dehan ona katak Díli livre ona hosi COVID–19, entaun ami hahú reativa ona formasaun,” Franciso de Araujo hateten ba Agência Tatoli, via telefónika, tersa ne’e.
Bainhira Ministériu Edukasaun, Juventude no Desportu deside atu eskola sira iha Dili laran no universidade sira hahú hala’o ona ensinu aprendizajen, sentru ne’e mós hahú reativa formasaun ba formandu 200-resin ne’ebé tuir kursu lian inglés, portugés, administrasaun, jornalizmu no komputadór.
Sentru Formasaun Haburas Dezenvolve Talentu (HADEZTA) harii iha loron 25 fulan-outubru tinan 2008, ne’ebé Funda hosi Francisco de Araujo, atuál Diretór Sentru Formasaun HADEZTA.
Totál formandu ne’ebé tuir formasaun hosi 2008-2021 hamutuk 9.881. Hosi númeru ne’e 72% mak hetan ona servisu iha instituisaun Governu, Organizasaun Naun Govermentál (NGO), balun ba servisu iha Austrália, Inglatera, Korea, no formandu balun hetan mós Bolsu Estudu.
Sentru Formasaun Haburas Dezenvolve Talentu (HADEZTA), iha mós formasaun ba área konstrusaun hanesan kada tinan sentru formasaun HADEZTA hetan fundu hosi embaixada Japaun hodi halo konstrusaun ba postu saúde sira.
“Iha 2017, ami halo konstrusaun postu saúde iha munisípiu Viqueque, postu administrativu Ossú, suku Wabubu, iha aldeia Waimori. Iha 2018 halo mós konstrusaun ba postu saúde iha munisípiu Ermera, postu administrativu Atsabe, suku Wainunuk. Iha 2019 halo konstrusaun ba postu saúde rua iha área lahanesan, ida iha munisípiu Ermera, postu administrativu Railaco no ida seluk iha munisípiu Díli, postu administrativu Metinaro,” nia informa.
Iha tinan 2021, HADEZTA nafatin hetan fiar hosi Embaixada Japaun hodi halo konstrusaun ba postu saúde iha munisípiu Lautém, postu administrativu Lospalos, suku Soru.
“Konstrusaun halo hotu ona iha fulan abril ne’e, no agora hein de’it inaugurasaun hosi Ministériu Saúde nomós Embaixadór Japaun bainhira situasaun ne’e normál fila-fali,” nia dehan.
Konstrusaun postu saúde ne’e ho fundu hamutuk rihun $91, ho medida 9 X 12 ne’ebé hahú iha fulan-janeiru no termina ona konstrusaun ne’e iha fulan-abríl, ho durasaun fulan tolu nia laran.
Halo konstrusaun ba postu saúde hanesan sala farmasia, sala laboratóriu, sala administrasaun, sala baixa, sala konsultasaun jerál, konsultasaun maternidade, no kompleta mós ho bee-moos, kuzina fatin, haris fatin, no moru iha postu saúde ne’e rasik.
Jornalista : Nelia Fernandes
Editór : Cancio Ximenes
