MANUFAHI, 07 jullu 2021 (TATOLI)–Gabinete Apoiu Sosiedade Sivíl (GASC, sigla portugés) apoia Cruz Vermelha de Timor-Leste (CVTL, sigla portugés) halo konstrusaun ba sanitáriu públiku iha Fleixa ida, iha dalan entre postu administrativu Maubisse, munisípiu Ainaro no munisípiu Manufahi no dalan entre Dili no Manatuto ne’ebé lokaliza iha Behau ho progresu fíziku besik finaliza.
Tuir Koordenadór GASC, Filipe da Costa, programa ne’ebé hili hodi fó apoia finanseira ba Cruz Vermelha maka konstrusaun sanitáriu públiku no apoia atividade buka rasik osan.
“Kona-ba konstrusaun sanitáriu públiku, tanba liga problema nasionál hanesan má nutrisaun, problema ne’e tenke halo aprosimasaun multisetorál hanesan edukasaun, bee no saneamentu, inklui aihan. Kontribuisaun CVTL atu fornese bee no saneamentu, nune’e kuandu ita halo viajen mak presiza karik ita iha ona,” Koordenadór hateten hafoin observa konstrusaun sanitáriu públiku iha Fleixa, kinta ne’e.
Ezisténsia CVTL tuir Rezolusaun Governu tinan 2015, hanesan organizasaun umanitária no auxiliár Governu.
“Hafoin tinan 2017 iha alterasaun ba Rezolusaun Governu hodi deside fó apoiu finanseiru ba organzisaun Cruz Vermelha de Timor-Leste, entaun bazeia ba ida-ne’e maka desde 2018 GASC fó ona apoia finanseira ba organizasaun ne’e,” nia esplika.
Tinan kotuk harii ona sanitáriu públiku rua iha Largo Lecidere, Dili, maski antes ne’e iha ona sanitáriu temporáriu maibé ho apoia fundu hosi GASC harii tan permanente ho kondisaun di’ak no moos.
“Haree ba ezemplu rua ne’ebé sira halo iha Dili, espera sanitáriu públiku rua ne’ebé harii iha Fleixa no entre Dili-Manatuto bele iha kondisaun hanesan iha Dili. Espera programa ne’e organizasaun seluk bele kontinua, atu nune’e viajen entre munisípiu sira iha ona kondisaun,” nia akresenta.
Tuir responsável ne’e, fasilidade públiku hanesan kondisaun ida ne’ebé importante ba ema turizta sira, tanba ne’e GASC espera ho fasilidade hirak ne’e bele atrai liután ema sira ne’ebé halo viajen no ajuda saúde públika atu nune’e labele soe foer arbiru de’it iha fatin sira liliu estrada públika.
Kriteria ne’ebé atuharii molok harii fasilidade públiku ne’e maka tenke iha bee-moos, kuandu laiha tenke fura, nune’e utilizasaun ba fasilidade ne’e bele moos no di’ak, aleinde ne’e halo sosilizasaun utilizasaun sanitáriu públiku tanba realidade iha Largo Lecidere ema laiha konsiénsia.
Kada sanitáriu $7.000, maibé fahe ba feto no mane inklui fatin fase liman, no torneira ida.
Iha fatin hanesan, Ofisiál Tékniku CVTL, Duarte Guterres, hateten, nia parte simu orientasaun hosi superiór hodi harii sanitáriu públiku iha Fleixa, tanba ne’e ekipamentu kompletu ona no sira hahú konstrusaun, durasaun ba obra ne’e fulan rua.
“Fleixa nu’udar sentru ba ema ne’ebé halo viajen, tanba ne’e hili fatin ne’e atu tau sanitáriu públiku ne’e pertinente tebes,” nia akresenta.
Iha tinan 2019, GASC halo transferénsia dahuluk ho valór $250.000 no durante Governu utiliza orsamentu doudésimu mós nafatin hetan apoiu.
GASC apoia CVTL $300.000-resin iha tinan ne’e hodi finansia kustu operasaun tomak, hahú hosi selu funsionáriu sira, fasilidade eskritóriu no atividade balun hanesan selu funsionáriu nasionál to’o filiál sira ho fundu hosi GASC.
Iha tinan 2021, Cruz Vermella propoin atividade lubuk ida maibé iha atividade balun de’it mak apoiu hanesan kustu operasaun mantein, tanba ne’e maka hodi selu funsionáriu sira atu nune’e halo atividade umanitária no atividade voluntáriu.
Jornalista : Antónia Gusmão
Edirtora : Julia Chatarina
