MANUFAHI, 07 jullu 2021 (TATOLI)–Gabinete Apoiu Sosiedade Sivíl (GASC, sigla portugés) komprometidu atu apoia Fundasaun Alola ba programa Suku Hadomi Inan ho Oan (SHIO) ne’ebé sei kuidadu saúde inan no oan.
“Objetivu Fundasaun Alola di’ak tebes tanba hakarak fó nutrisaun hahán di’ak ba inan no oan iha Timór, tanba ne’e ho fundu ne’ebé iha bele hala’o atividade tanba dadus hatudu Manufahi nu’udar munisípiu daruak rejista má nutrisaun, tanba ne’e maka Fundasaun Alola mai realiza programa ne’e hodi redús númeru,” Koordenadór GASC, Filipe da Costa, hateten, iha suku Holarua, postu administrativu Same, munisípiu Manufahi, kuarta ne’e.
Notísia relevante: GASC apoia Fundasaun Alola prátika tein hahán nutritivu iha Manufahi
Koordenadór ne’e husu ba inan sira atu aproveita didi’ak informasaun atividade sira ne’ebé ekipa fundasaun realiza hanesan prátika tein hahán nutritivu iha uma, nune’e bele sai hosi problema má nutrisaun.
Governu lansa ona planu asaun nasionál, ne’ebé relata katak to’o tinan 2030 labele iha tan populasaun ida menus nutrisaun, ne’ebé dadaun ne’e populasaun menus nutrisaun 24,9%.
Enkuantu, labarik ho rasa badak daudaun 47,1%, maibé tenke redús ba 25%, sira ne’ebé krekas daudaun 8,6% tenke redús ba 3%, hirak ne’ebé todan ka boot demais tenke redús menus hosi 1,5% iha tinan 2030.
“Atu redús kestaun hirak ne’e, inan-aman sira presiza kolabora, ita lakohi labarik sira má nutrisaun tanba la’ós problema serbisu la badinas de’it maibé mós ninia kakutak la badinas, labarik Timór mak iha kakutak la badinas barak, ita-nia nasaun sei hetan problema boot iha futuru,” nia akresenta.
Tanba ne’e, Governu preokupa no prodús planu asaun atividade, ne’ebé Fundasaun Alola realiza.
Responsável GASC apresia tebes ho atividade Fundasaun Alola hafoin tun direta ba terrenu hodi halo monitorizasaun tanba alvu hosi atividade di’ak tebes ba inan no oan.
Jornalista : Antónia Gusmão
Editora : Julia Chatarina
