BAUCAU, 07 jullu 2021 (TATOLI)–Diretór Servisu Saúde Munisípiu Baucau (SSMB), Domingos Reinaldo da Costa Guterres, hateten pesoál saúde hanesan parteira limitadu tebes, nune’e seidauk sufisiente atende inan isin-rua iha rejiaun ne’e.
“Númeru parteira iha Baucau pur volta 70 resin, maibé seidauk sufisiente tamba Sentru Saúde balun laiha parteira hanesan iha Larisula, postu Baguia, Bercoli, postu Venilale, balun iha maibé na’in-ida de’it hanesan Sentru Saúde Bucoli, balun mamuk parteira laiha. Dalaruma médiku no infermeira mak atende,” Diretór SSMB informa iha ninia knaar fatin, Ria-mare, kuarta ne’e.
Domingos esplika, parteira seidauk sufiente tanba depende ba instituisaun ne’ebé prodús parteira ne’e rasik, tinan ne’e anunsia ona vaga ba parteira maibé seidauk barak.
“Iha parteira balun kontinua estudu, entaun afeta ba fatin balun mamuk, ne’ebé problema ba ita mak ne’e,” nia akresenta.
Parte SSMB halo ona pedidu liuhosi Diresaun Rekursu Umanu, maibé depende ba Goveru sentrál, aleinde ne’e iha parteira balun maka dezloka iha área servisu fatin, maibé to’o tinan haat ba lima husu muda tamba razaun distánsia dook hosi família.
“Ita prefere parteira serbisu iha fatin, klosan, karik hetan rai-na’in ruma pois hela metin di’ak liután, ita kontente tanba nia mai hela metin maibé depende ba situasaun,” nia hatutan.
Jornalista : Natalino Belo
Editora : Julia Chatarina
