VIQUEQUE, 07 jullu 2021 (TATOLI)—Sekretáriu Estadu Protesaun Sivíl (SEPS), Joaquim Gusmão enkoraza populasaun iha munisípiu Viqueque atu hakbesik-an ba postu vasinasaun hodi simu vasina, nune’e bele proteje-an hosi virus ne’ebé espalla iha mundu inklui Timor-Leste (TL).
“Ha’u enkoraza populasaun atu prevene-an hosi COVID-19. Ha’u mai iha ne’e atu husu mós ba inan-aman sira hakbesik-an ba sentru saúde hodi simu vasina,” Joaquim Gusmão hateten ba jornalista Agência Tatoli, iha Viqueque Vila, kuarta ne’e.
Notísia relevante:Populasaun Viqueque ho Lautem 17.189 simu ona vasina
Husu mós ba populasaun tomak atu kontinua kumpre protokolu saúde ba prevensaun COVID-19, hanesan uza máskara, fase liman beibeik no distánsial sosiál.
Tuir dadus hosi Serbisu Saúde munisípiu Viqueque, to’o 28 juñu 2021, populasaun ne’ebé simu ona vasina doze daruak hamutuk 1.042, doze dahuluk ne’ebé hahú vasina iha 14 juñu 2021 ba ema na’in 8.441.
Iha 06 jullu 2021, Sentru Integradu Jestaun Krize (SIJK) fó-sai kazu konfirmadu pozitivu COVID-19 iha munisípiu Viqueque detetadu foun iha oras 24 ikus hamutuk na’in-sia.
Jornalista: Vitorino Lopes da Costa
Editór: Cipriano Colo
