DILI, 08 jullu 2021 (TATOLI)—Centro Formação Institute of Education (CFIE) hahú reativa ona atividade formasaun ba formandu na’in 513 iha fulan ne’e nia laran.
“Iha ami-nia sentru formasaun ne’e reativa fali ona. Ami haruka funsionáriu sira tama ona hodi halo preparasaun ba dadus sira. Sira mós agora daudaun komesa simu fali ona estudante foun, nune’e aban no bainrua ami komesa hala’o ona ami-nia atividade kursu normál fali ona. Maibé, ami la’o-tuir protokolu hosi Ministériu Saúde no Organizasaun Mundiál Saúde,” Diretór Institute of Education, Mateus Fernandes ‘Maukali’, informa ba Agência TATOLI, iha nia kna’ar-fatin, Mandarin, Dili, kinta ne’e.
Atividade formasaun ba formandu sira la’o ona dezde fulan-janeiru 2021 liubá maibé tanba vijénsia COVID19 no Governu aplika medida serka sanitária no konfinamentu obrigatóriu entaun atividade suspende.
Nia fó-sai katak, formandu hamutuk na’in 513 kompostu hosi feto 367 no mane 146 iha área lian inglés, portugués, korea, komputadór, administrasaun, ospitalidade no turizmu.
Estabelesimentu Sentru Formasaun Institute of Education iha tinan 2016, ne’ebé funda hosi ema na’in 10 inklui Vise-Ministru Edukasaun Juventude no Desportu (MEJD), Antonio Guterres.
Ezisténsia sentru formasaun ho objetivu prinsipál hasa’e koñesimentu no kapasita joven sira no ajuda joven sira, liuliu iha área formasaun edukasaun naun-formál.
Iha parte seluk, nia fó-sai katak, totál formandu ne’ebé tuir formasaun iha tinan 2020 hamutuk na’in 624 no formandu hamutuk 100-resin mak hetan ona serbisu.
Jornalista : Nelia Fernandes
Editór : Cancio Ximenes
