DILI, 08 jullu 2021 (TATOLI)-–Ministru Koodenadór Asuntu Ekonómiku (MKAE), Joaquim Amaral, konsidera vantajen pograma Cesta Bázika atu intensiva povu agrikultór sira iha territóriu nasionál atu hasa’e produsaun ai-han liuhosi halo natar no to’os.
“Ita iha prova katak programa Cesta Bázika bele intensiva agrikultór sira hasa’e produsaun tanba dadus hosi Ministériu Agrikultór no Peska (MAP) hatudu katak natar no to’os sira ne’ebé uluk abandonadu, maibé agora povu agrikultór sira kuda hotu ona no hare tinan ne’e produsaun sa’e,” Ministru Joaquim hateten ba Agência TATOLI, iha ninia knaar fatin, Palásiu Governu, kinta ne’e.
VIII Governu Konstitusionál deside halo alterasaun ba dekretu-lei númeru 48/2020, loron 07 outubru, hodi halo distribuisaun programa Cesta Bázika iha ámbitu rekuperasaun ekonómika ba kurtu prazu, ho objetivu atu fó apoiu nesesidade bázika, kombate hamlaha ba ema vulnerável liu, apoiu ba agrikultór, produtór no komersiante lokál.
Tuir nia, Governu mós halo hela planu atubele sosa ka absorve produsaun sira hosi povu agrikultór sira hodi intensiva no enkoraja hodi prodús produtu lokál.
“Ita kontinua garante produtór ka agrikultór sira atu aumenta sira-nia esforsu hasa’e produsaun tanba Governu no setór privadu sira kontinua buka sosa produtu sira ne’ebé agrikultór sira,” nia akresenta.
Tuir dokumentu planu rekuperasaun ekonómika, objetivu programa Cesta Bázika atu apoiu família sira hetan nesesidade bázika hodi kontribui kombate hamlaha no vulnerabilidade, apoiu ba agrikultór, pordutór no komersiante.
Seidauk bele garante inseguransa ai-han
Governante ne’e mós rekoñese Cesta Bázika seidauk bele garante problema inseguransa ai-han no má nutrisaun tanba hetan influénsia hosi fatór oin-oin ne’ebé presiza resposta ho intersetoriál hodi inklui setór agrikultór, saúde, komérsiu, no seguransa alimentár hodi garante populasaun la hamlaha.
“Ha’u hanoin redusaun hamlaha sim, tanba objetivu ida atu ema hotu asesu ba ai-han iha situasaun COVID-19 ne’ebé ho lais. Tanba Cesta Bazika atu taka ida-ne’e hodi popoulasaun asesu ai-han ho lais,” nia dehan.
Tanba seguransa ai-han mak situasaun ne’ebé iha ligasaun atu ema hotu asesu fíziku, sosiál no ekonomia ba ai-han ne’ebé sufisiente, seguru no iha nutrisaun ne’ebé korresponde ba sira-nia nesesidade atu halo moris ativu no saudávél.
“Ita bele dehan iha territóriu nasionál konklui ona iha faze atu rezolve reklamante sira. Tanba aldeia no suku balun seidauk tama hotu ona ba prosesu reklamasaun ne’ebé ita hein jullu ne’e bele rezolve ona reklamate sira,” nia afirma.
Dadaun ne’e, MKAE rejista númeru reklamasaun hamutuk 24.000, maibé sei avaliasaun liuhosi Ministériu Administrasaun Estatál atubele ba suku no aldeia hodi prova dadus, atu rezolve lalais iha fulan ne’e.
Tuir diploma ministeriál konjutu númeru 38/2020, 26 outubru, produtu ne’ebé tama ba lista programa Cesta Bázika maka, produtu alimetár, kompostu husi foos, batar, kote/fore, amendoim, sorgum dulas, faé, amsin, fehuk ropa, susu ben, masin midae, manu, manu tolun, mina tein, mina nú, trigu, inklui moda sira hanesan ervilla, tomate, koto nurak, fore sikore, repullu, kouve, modo metan, modo mutin no modo seluk tam.
Enkuantu ba produtu ijiene maka, sabaun, álkool Jl, deterjente, eskova nehan, pasta nehan.
Kompañia 232 mak fornese programa Cesta Bázika
Bazeia ba dekretu-lei númeru 48/2020, 07 outubru, kona-ba medida apoiu, atirbuisaun Cesta Bázika, operadór ekonómiku lokál iha ámbitu planu rekuperasaun ekonómika ho kria rejime espesiál aprovizionamentu ba feitu, iha artigu 10 kona-ba modalidade aprovizionamentu, temi katak aprovizionamentu ba akizasaun produtu Cesta Bázika realiza, temi katak aprovizionamentu ba akizasaun produtu Cesta Bázika realiza bazeia ba modalidade ajudikasaun direita to’o lomite verba ne’ebé aloka ba estidade ajudikante ne’ebé ministériu indika ona.
Nune’e, Governu kontrata kompañia fornesedór Cesta bázika iha terrítoriu nasionál hamutuk 232, ho ho kálkulu fó servisu ba timor-oan hamutuk 100.080 hodi fornese ai-han ba populasaun milaun 1,5 ho kada ema hetan valór $ 25 durante fulan-rua.
Nune’e, Hahú hosi 14 juñu, benefisiáriu ne’ebé simu ona produtu Cesta Bázika hamutuk ema milaun 1,3 resin ka reperzenta 91,8% hosi totál benefisiáriu ema milaun 1,5.
“Ita envolve kompañia iha territóriu nasionál hamutuk 200-resin, ne’ebé pagamentu faze dahuluk finaliza ona, tama ona ba faze daruak, nune’e empreza ne’ebé seidauk hetan pagamentu koordena ho ministériu implementadór sira halo CPV ba MF halo verifikasuan no pagamentu,” Governante ne’e afirma.
Totál orsamentu ba programa Cesta Bázika hamutuk millaun $82, ne’ebé ekivalente ho totál populasaun millaun 1,5 tuir lista atuál hosi Ministeriu Administrasaun Estatál (MAE).
Suspende pagamentu ba kompañia fahe la tuir folin
Governu dezeña sistema ajudikasaun direita tanba atu rekupera mós empreza sira atu iha rekursu finanseriu hodi labele tama iha falénsia no kontinua fó kampu traballu ba timor-oan sira.
“Empreza sira ne’ebé fahe sasan la tuir folin, Ministériu implementadór no insitutiusan hanesan Komisaun Anti Korrupsaun no PDHJ ne’ebé akompaña besik, maka deteta tenke haruka kompleta, hafoin halo pagamentu, se la’e suspende pagamentu tanba populasaun iha direita atu hetan duni sasan tuir tabela estandarte” nia rekomenda.
Cesta Bázika la’ós ajuda komunidade atu hetan ai-han, maibé ajuda mós kompañia, ne’ebé labele hanoin de’it reseita hodi haluha resposabilidade tuir kontratu hodi distribui sasan ho folin estandarte.
“Ha’u bele dehan benéfisiu boot tebes ba kompañia tanba ne’e ha’u husu responsabilidade nuudar Timor-oan. Ita hakarak atu Timor-oan hotu ne’ebé simu sasan ne’e kontente, empreza mós kontente no Estadu mos kontente,” nia afirma.
Iha fulan-marsu to’o inísiu jullu 2021, MF realiza ona pagamentu Cesta Bázika (faze I no II) hamutuk $41,2
Pagamentu ne’e, hafoin kompañia fornesedór sira (100%) kumpre devér hodi selu impostu redimentu 0,5% hosi totál pagamentu ba Autoridade Tributária no MF ho totál kontirbuisaun impostu hamutuk $206.400.
Foin lalais ne’e, MF aprova ona commitment payment Voucher (CPV) foun Cesta Bázika hamutuk 108, kompostu hois MTKI iha CPV 67 ho montante milaun $21,3, Sekretaria Estadu Kooperativa Estadu Kooperativa (SEKoop) iha CPV 17 ho montante millaun $7,9 ho Ministériu Agrikultura no Peskas (MAP) iha CPV 24 ho montante $29.
Jornalista : Florêncio Miranda Ximenes
Editora : Julia Chatarina
