VIQUEQUE, 8 jullu 2021 (TATOLI)—Diretór Eletrisidade Timor-Leste, Empreza Públika (EDTL,E.P) Viqueque, Eduardo Sarmento, informa durante ne’e tékniku-sira enfrenta difikuldade atu hala’o serbisu ho efetivu tanba falta transporte no ekipamentu.
“Durante ne’e tékniku-sira laiha transporte, ekipamentu no presiza aumenta mós rekursu umanu hodi bele kobre área munisípiu tomak ne’ebé luan,” Eduardo Sarmento, hateten ba jornalista Agência Tatoli, iha edifísiu EDTL,E.P Viqueque, kuarta ne’e.
Notísia relevante:2021, suku tolu iha Bobonaro sei asesu eletrisidade
Maski ho buat ne’ebé limitadu, maibé Eduardo Sarmento hateten, ida ne’e la impede vontade tékniku sira nia esforsu hodi atende komunidade liuliu ba atendimentu no kontrolu eletrisidade iha suku no kapitál ne’ebé asesu ona.
Kona-bá preokupasaun ne’e, Prezidente EDTL,E.P, Paulo da Silva dehan, parte EDTL,E.P nasionál tau ona ba prioridade no tinan ida ne’e sei sosa karreta hamutuk 30, ekipamentu protesaun no rádiu komunikasaun ba tékniku-sira, iha munisípiu hotu, atu bele hala’o serbisu iha terrenu ho seguru.
“Ita iha problema barak inklui menus fasildade. Tanba ne’e, hanesan empreza ita halo ezersísiu no tinan ida-ne’e ita sei responde balun. Prosesu aprozionamentu la’o ona hodi sosa sasan ba tékniku-sira,” Paulo da Silva informa.
Oras ne’e daudaun, tékniku EDTL,E.P iha munisípiu Viqueque hamutuk na’in 22 no na’in 15 iha Viqueque Villa, Uatulari na’in-haat, Ossu na’in-ida, Uatucarbau na’in-ida no Lacluta na’in-ida.
EDTL,E.P Viqueque iha de’it karreta ida ne’ebé uza ba operasionál iha Viqueque-Villa no labele kobre ba postu administrative Uatulari, Uatucarbau, Ossu no Lacluta.
Paulo da Silva enkoraza tékniku Timoroan aprende ho CNI-22
Paulo da Silva mós enkoraza téniku timoroan ne’ebé serbisu iha sub-sentrál eletrika Viqueque atu esforsu hodi aprende ho téniku sira hosi Chinese Nuclear Industry Construction Company No. 22 (CNI22), hodi kontrola sistema eletisidade ho profisionál.
“Ha’u husu imi tenke hakbesik-an ba tékniku-sira hosi CNI-22, tanba sira-nia kontratu besik remata ona. Tanba ne’e, imi tenke aprende hodi kontrola sistema iha sub-sistema sira,” nia husu.
Nia dehan, objetivu hosi destakamnetu tékniku na’in-rua hosi CNI-22 iha munisípiu atu ajuda no transmite mós matenek ba tékniku sira iha munisípiu, liuliu kona-ba Sistema eletrisidade.
Iha fatin hanesan, tékniku operadór sub-sentrál Viqueque, Francisco Pinto da Silva, hateten koordenasaun entre tékniku timor-oan ho tékniku hosi CNI-22 la’o di’ak no sempre kolabora hamutuk.
Okaziaun ne’e tékniku operadór CNI-22, Wilian, haktuir operadór CNI-22 sempre hatudu sistema kontralu ba téniku operadór-sira hodi halo kontrolu ba Sistema-sira iha sub-sentrál.
Jornalista: Vitorino Lopes da Costa
Editór: Cipriano Colo
