COVALIMA, 08 jullu 2021 (TATOLI) – Governu liuhosi Vise-Ministériu Administrasaun Estatál (MAE), Lino Torrezão, kinta ne’e, hatuur fatuk-inan ba konstrusaun uma kbiit-laek (UKL) ba família kbiit-laek iha Postu Administrativu Fatululik, Munisípiu Covalima.
Notísia Relevante : Uma-kain 623 iha Taroman asesu bee-moos
“Ami halo lansamentu hatuur fatuk-inan ba konstrusaun UKL ba benefisiáriu iha Aldeia Makous ho Suku Fatululik,” Vise-Ministru MAE Lino Torrezão ba jornalista iha postu Fatululik, Covalima.
Benefisiáriu Gaspar da Cruz, apresia ho Governu kontente tanba hetan apoiu uma hosi Governu liuhosi PNDS.
Gaspar hanesan xefe família ne’ebé durante ne’e hela iha uma-duut ne’ebé didin ho fafulu ka bambuu hodi hela hamutuk ho nia fen ho nia oan na’in-hitu (7).
Administradór Postu Fatululik, Elias da Cruz agradese ba prezensa Vise-Ministru MAE, Lino Torrezão, hodi hatuur fatuk-inan.
OJE 2021, Governu liuhosi PNDS sei konstrui uma ba kbiit-laek sira iha territóriu nasionál tuir pedidu ne’ebé hato’o hosi autoridade lokál sira.
Konstrusaun ne’e sei korresponde ho Planu Estratéjiku Dezenvolvimentu Nasional (PEDN) 2011-2030 ne’ebé rekoñese povu Timor-Leste nia aspirasaun atu harii nasaun ida ne’ebé forte, prósperu no moris di’ak.
Iha tinan 2021 Governu sei harii UKL hamutuk unidade 1.254, ho totál orsamentu tokon $25 ho kustu ba kada uma entre $14.000 to’o $17.000.
Jornalista : Celestina Teles
Editór : Francisco Simões
