AINARO, 08 jullu 2021(TATOLI)–Grupu kooperativa produsaun multi-setorál husu Sekretaria Estadu Kooperativa (SEKoop) atubele prepara baze legál ba atividade kooperativa hodi kontribui di’ak liután ba atividade ekonómika iha Timor-Leste.
Koordenadór grupu kooperativa produsaun multi-setorál, Cipriano Steves, hateten, durante ne’e grupu kooperativa munisípiu Ainaro rasik halo produsaun barak maibé seidauk hetan legalidade hosi parte Governu.
“Ami seidauk iha númeru serteza grupu kooperativa maibé ami-nia grupu daudaun ne’e iha 152, grupu benefisiáriu indireita hamutuk 6.000 maibé ami seidauk hetan legalidade, tanba ne’e ami ohin husu prepara kondisaun,” Koodenadór informa ba Agência TATOLI, iha edifísiu Ministeriu Agrikultura no Peska (MAP) Ainaro, kinta ne’e.
Grupu kooperativa durante ne’e prodús produtu oin-oin hanesan morangu, modo, liis, tomate, ainanas inklui produtu seluk.
“Ami iha produtu pur volta 1.000,” nia akresenta.
Tanba ne’e, nu’udar koodenadór, nia parte promete sei esforsu hodi kontinua buka merkadu ba rezultadu produsaun to’os-na’in sira ne’ebé hakma’an-an iha grupu ne’e.
“Ha’u enkoraja produtór sira iha grupu ne’e, tanba ha’u-nia knaar hanesan mós sidadaun no lori grupu sira buka merkadu,” nia hatutan.
Durante ne’e grupu kooperativa sira fa’an produtu iha merkadu hodi hetan rendimentu di’ak.
“Sira balun lori ona produtu ba loja Dili Mart, Lita Store no Loja Agrikultór rua iha Dili, no iha semana ida foti osan no rendimentu hosi ne’e. Ha’u orienta sira foti 40% de’it, enkuantu 60% rai iha kooperativa hodi haforsa produsaun,” Koordenadór dehan.
Iha fatin hanesan, membru grupu KPM, Aderito Soares da Costa Moniz, informa, atividade ne’ebé durante ne’e halo maka kuda hudi, modo, inklui hakiak bibi iha luhan, ne’ebé konsege fa’an ona iha merkadu iha Ainaro no Maubisse.
“Ami prodús tuir de’it kbiit ne’ebé iha. Ami harii grupu maibé ninia lala’ok atu la’o oinsá ami seidauk hatene, tanba ne’e ami presiza formasaun atubele hatene lala’ok. Durante ne’e seidauk temi kooperativa, ami hala’o grupu duni maibé la hatene kooperativa ne’e la’o oinsá,” nia subliñ.
Jornalista : Natalino Costa
Editora : Julia Chatarina
