DILI, 08 jullu 2021 (TATOLI)–Sekretaria Estadu Formasaun Profisionál no Empregu (SEFOPE) selebra akordu ho United Nation Development Programme (UNDP) atu apoia funsionáriu responsável implementa programa ‘Hamutuk serbí Komunidade’, ne’ebé sei realiza durante fulan-neen iha aldeia 50, iha munisípiu Dili.
“Objetivu apoiu funsionáriu na’in-10 atu avalia implementasaun projetu hamutuk serbí komunidade ho intensiva kada loron $5, atu ajuda fó serbisu ba komunidade sira,” Diretór Jerál SEFOPE, Paulo Alves, informa iha edifísiu Caicoli, kinta ne’e.
UNDP hakarak envolve mós funsionáriu SEFOPE sira tanba antes ne’e implementa ona programa hakbiit komunidade ho intesiva kada loron $3.
Iha Biban hanesan, Sekretáriu Estadu Formasaun Profisionál no Empregu, Alarico do Rosário, husu ba funsionáriu sira atu hatudu profisionalizmu hodi apoia implementasaun programa hodi bele la’o ho di’ak.
“Ita boot sira ba atu ajuda programa ne’e la’o ho di’ak, tanba apoiu ne’e foku ba vítima dezastre naturál sira. Ha’u hanoin programa labele halo de’it iha Dili, maibé presiza implementa mós ba munisípiu sira ne’ebé sai vítima mós ba inundasaun,” nia akresenta.
Reprezentante Rezidénsia UNDP iha Timor-Leste, Lazima Onta-Bhatta, dehan, projetu ne’e hala’o iha munisípiu Dili, ne’ebé hetan impaktu maka’as hosi dezastre naturál iha loron 04 abríl.
“Fundu ba munisípiu Dili de’it ne’ebé hetan impaktu maka’as inundasaun atu fó insentiva espesiál, maibé iha planu mós atu implementa iha munisípiu lima seluk,” nia hatutan.
Programa ‘Hamutuk Serbi Komunidade’ hanesan programa ne’ebé realiza ho kolaborasaun hosi UNDP, SEFOPE, Ministriu Administrasaun Estatál (MAE), Ministériu Solidaridade Sosiál no Inkluzaun (MSSI).
Kustu ba progama ne’e mai hosi Governu Timor-Leste, Banku Dezenvolvimentu Aziátiku (ADB, sigla inglés), ne’ebé suporta mós hosi Governu Japaun no Koreia Súl ho montante millaun $$1,3.
Jornalista : Florêncio Miranda Ximenes
Editora : Julia Chatarina
