AINARO, 08 jullu 2021(TATOLI)—Ekipa hosi Sekretaria Estadu Kooperativa (SEKoop) fó formasaun ba grupu kooperativa produsaun multi-setorál, durante loron tolu, hahú loron 08 to’o 10 jullu, kona-ba oinsá atu jere koperativa ho di’ak.
“Ohin ita fó formasaun ba grupu kooperativa sira no durante sai oradór, ha’u aprezenta matéria dezenvolvimentu integradu baze iha kooperativa,” Sekretáriu Estadu Kooperativa, Elizário Ferreira, informa iha salaun Ministériu Agrikultura no Peska (MAP) munisípiu Ainaro, kinta ne’e.
Tuir governante ne’e, formasaun ne’e importante ba dirijente kooperativa no membru sira atubele jere no organiza kooperativa.
“Filosofia kooperativa ba membru sira mak oinsá envolve-an iha kooperativa. Filosofia hosi membru ho nembru ba membru, katak osan ka sasán mai hosi membru no sira mak jere no sei benefisia ba sira,” nia esplika.
Nia dehan, atu asesu ba osan kooperativa, populasaun sira tenke organiza oinsá atu hetan osan hodi bele kompleta nesesidade família ka organizasaun, ho servisu ne’ebé tenke hisik kosar.
“SEKoop nia pilár importante iha kooperativa maka tenke liuhosi edukasaun, tanba kooperativa presiza hahú ho edukasaun, dezenvolve ho edukasaun, kontrola ho edukasaun no dependénsia totalmente ba edukasaun,” SEKoop subliña.
Aleinde ne’e, nia konsidera kooperativa nia kapitál mai hosi partisipasaun ekonómika membru no solidariedade.
“Membru kooperativa sira tulun-an rasik no tulun ema seluk. Na’an manu sira tenke mai hosi agrikultór sira. Iha vida negósiu, ema-nia tanis mak ita-nia tanis, tanba bainhira membru kooperativa ruma hetan susar, membru sira tenke fó tulun ba malu,” nia tenik.
Sekretáriu Estadu konsidera, bainhira hakarak harii sosiedade ida asosiadu, presiza moris hamutuk.
“SEKoop akompaña bainhira ita-boot sira superviziona no auditoria, kooperativa sira aban bainrua sei hetan supervizaun hosi SEKoop maibé sei la fó osan boot, fó de’it osan ne’ebé atu asegura fatin (sede) kooperativa nian,” nia dehan.
Iha fatin hanesan Koordenadór grupu kooperativa produsaun multi-setoriál Ainaro, Ciprino Steves, konsidera formasaun ne’e importante atu aumenta koñesimentu dirijente no membru kooperativa atu jere saida maka sira prodús.
Jornalista : Natalino Costa
Editora : Julia Chatarina
