COVALIMA, 08 jullu 2021 (TATOLI)–Abitante uma-kain 623 iha Suku Taroman, Postu Administrativu Fatululik, Munisípiu Covalima, ohin ba oin, asesu ona bee-moos sufisiente.
Kanalizasaun bee-moos ne’ebé konstrui hosi Programa Nasional Dezenvolvimentu Suku (PNDS) ne’e, inaugura ona hosi Vise-Ministru Administrasaun Estatál, Lino Torrezão ho autoridade Munisípiu Covalima.
“Ita inaugura sistema gravitasaun bee-moos ba Aldeia Lian Nain ho Aldeia Tarorman no ita inaugura reabilitasaun sede Suku Taroman ho Fatululik,” Vise-Ministru Lino Torrezão hateten.
Oportunidade ne’e, Vise-Ministru MAE Lino Torrezão, inaugura mós sede Suku Fatululik.
Orsamentu ba reabilitasaun ba sede suku no dade bee-moos ne’e hamutuk $22.000,00 ho nia durasaun tempu fulan tolu maibé depende ba kondisaun jeográfika komunidade sira gasta orsamentu hamutuk $28.000,00.
Tuir planu, tinan oin mós MAE kontinua halo reabilitasaun sede suku no bee-moos iha territóriu Timor-Leste.
Biban ne’e, Administradór Munisípiu Covalima, Francisco de Andrade, fó hanoin ba komunidade atu uza bee-moos ho kuidadu.
Abitante aldeia tolu lá asesu eletrisidade
Abitante Aldeia Makous, Holbak no Fatuloro, Suku Taroman, Postu Administrativu Fatululik, Munisípiu Covalima, to’o oras ne’e seidauk asesu eletrisidade.
Xefe Aldeia Macous, Francisco Leite husu ba Governu atu dada eletrisidade no mós had’ia estrada ba komunidade sira iha Postu Fatululik.
“Ha’u husu Estadu tenke tau matan lalais ba komunidade ne’ebé seidauk la asesu ba eletrisidade no estrada,” Xefe Aldeia Makous, Francisco Leite informa ba Agência Tatoli iha Aldeia Makous, kinta ne’e.
Ho estrada ne’ebé aat no lá iha eletrisidade fó impaktu ba estudante-sira atu estuda, nune’e komunidade sira uza de’it solar panel ka lampu tradisionál hodi bele uza.
Fatululik potensialidade ba produtu agríkola hanesan koto, kami, liis, kafé no seluk-seluk tan, maibé tanba estada aat difikulta agrikultór sira atu lori ba merkadu.
Juventude Postu Fatululik, Orlando da Cruz, husu Governu atu aselera dada-ahi no hadi’a estrada ba komunidade sira iha Postu Fatululik.
Jornalista : Celestina Teles
Editór : Francisco Simões
