DILI, 08 jullu 2021 (TATOLI)–Unidade Planeamentu, Monitorizasaun no Avaliasaun (UPMA) hosi Gabinete Primeiru-Ministru (GPM) no Ministériu Finansa (MF) Diresaun Jerál Planeamentu no Orsamentu (DGPO, sigla portugés) hahú ezersísiu preparasaun no elaborasaun planu anuál ba Orsamentu Jerál Estadu (OJE) 2022.
Tuir Koordenadora UPMA, Brígida Soares, taxa ezekusaun la’os ona sai fatór determinante atu sukat ka deside montante orsamentu ne’ebé atu aloka ba kada instituisaun.
“Rezultadu implementasaun programa sai fatór importante hodi sasukat montante ne’ebé sei aloka ba entidade idaidak iha tinan 2022 ho modelu orsamentu programátiku, maibé sasukat hun mak atinjimentu meta ne’ebé trasa ona ho orsamentu, tanba ne’e bainhira la atinje meta sai fatór sei determina montante osan ba programa no atividade iha tinan sira tuir mai,” Koordenadora UPMA informa ba Agência TATOLI, iha ninia knaar fatin, Palásiu Governu, kinta ne’e.
Notísia relevante: UPMA-MF hahú konsulta instituisaun Estadu hodi rasionaliza númeru programa
Tanba ne’e, UPMA no MF sei haree didi’ak rezultadu ne’ebé atinje tinan 2021 hosi kada instituisaun Estadu.
“Haree ba implementasaun durante fulan-neen ikus tinan 2021 ne’e, UPMA no MF sei halo analiza kle’an ba meta atinjidu pur atividade ne’ebé mak implementa ona hosi entidade sira,” Brígida Soares akresenta.
Aleinde ne’e, programa ne’ebé sei mantein mak programa Boa Governasaun no Jestaun Institusionál, maibé parte seluk sei iha mudansa uitoan.
“Programa hirak ne’ebé sei la afeta ba redusaun mak programa hosi entidade independente Estadu, maibé programa entidade governamentál tomak sei iha mudansa bazeia ba sub-setór Planu Estratéjiku Dezenvolvimentu (PED) no programa VIII Governu Konstitusionál,” nia akresenta.
UPMA no MF mós sei haree filafali kustu la nesesáriu sira hanesan supérfluos (gastu ezajeradu).
“Ezemplu hanesan gastu sira ba internet, gastu ba mákina no seluk tan, ne’ebé ami sei fornese pareser téknika ho rekomendasaun ba Komisaun Revizaun Orsamentu Polítika hodi bele deside korte sira ba planu anuál tinan 2022,” Koordenadora UPMA esplika.
Maski nune’e, tuir Brígida Soares, redusaun programa sei laiha implikasaun tanba redusaun kontinua haree ba rezultadu, sub-programa no atividade atuál instituisaun Estadu.
“Liña ministériu no ajénsia autónomu sira sei kontinua servisu maka’as hodi hadi’a sira-nia planu anuál 2022 ho di’ak liután, razoável, bele atije meta sira no bele sukat ninia rezultadu sira, ne’ebé entidade sira sei sofre korte ba atividade atuál ne’ebé mak karik identifika la tama ba sira-nia kompeténsia no knar tuir sira-nia orgánika,” nia subliña.
Jornalista : Antónia Gusmão
Editora : Julia Chatarina
