AINARO, 09 jullu 2021 (TATOLI)–Sekretáriu Estadu Kooperativa (SEKoop), Elizário Ferreira, motiva kooperativa kréditu uniaun Rai Didi’ak ba Futuru (RADIFU), atu kontinua hakat ba oin no aumenta kapitál maski hasoru dezafiu.
“Prezensa Sekretáriu Estadu atu motiva dirijente no membru kooperativa, atu nune’e bele organiza no mobiliza aumenta ema barak liután iha kooperativa no bele aumenta kapitál kooperativa,” Sekretáriu Estadu enkoraja partisipante asembleia kooperativa uniaun kréditu RADIFU ba dalimak, ne’ebé realiza iha salaun administrasaun postu administrativu Ainaro Villa, sesta ne’e.
Nia konsidera, vida kooperativa hanesan instrumentu a’as liu iha kooperativa laran atu halo avaliasaun ba dezempeñu estrutura, tanba ne’e asembleia ne’e atu reforsa liután rekuñesimentu ba atividade kooperativa durante tinan-ida.
“Bazeia ba relatóriu hosi kooperativa RADIFU, hanesan kooperativizta ida atu informa frakeza no dezafiu ne’ebé enfrenta inklui projeta saida mak bele atinje iha futuru,” nia akresenta.
Projesaun SEKoop maka, ba oin joven sira hola parte iha kooperativa RADIFU no sei orienta joven akompaña no mobiliza populasaun sira liuhosi fahe informasaun hodi ema hotu bele envolve-an iha kooperativa ho kuantidade boot liután.
“Bainhira populasaun Ainaro 66.000 no membru kooperativa seidauk atinje 1.000, ne’e parte ida dezafiu, maibé oportunidade maka oinsá ema kooperativa bele serbisu atinje membru barak, tanba kooperativa ne’e baze mak membru, tanba sira mak sai baze ba dezenvolvimentu kooperativa,” nia subliña.
Iha fatin hanesan, Prezidente Kooperativa RADIFU, Américo Lopes, hateten, atividade ne’e hodi aproveita aprezenta programa no planu ba kurtu, médiu, no longu prazu,” nia dehan.
“Dezafiu no problema maka dala balun membru sira empresta osan, maibé balun hatama macet uitoan no dala ruma atraza fulan-ida ka rua,” nia tenik.
Durante ne’e atividade kooperativa maka rai osan membru sira-nia no fó empréstimu ba membru hodi halo negósiu tuir idaidak nia área atu sustenta família.
“Ami iha kapitál agora daudaun $555.600 hosi membru 224,” Responsável kooperativa informa.
Hafoin asembleia jerál, kooperativa ne’e sei halo sosializasaun iha suku hitu iha postu administrativa Ainaro Villa atubele aumenta membru.
“Ida-ne’e rekomendasaun hosi SEKoop, tanba ne’e ami esforsu hela no ami nota rekomendasaun atu hadi’a fallansu atubele mellora di’ak liután serbisu kooperativa,” nia subliña.
Kooperativa kréditu uniaun RADIFU harii iha loron 01 outubru 2010, ho fundu inísiu $500.
Jornalista : Natalino Costa
Editora : Julia Chatarina
