iklan

AINARO, EKONOMIA, HEADLINE, MUNISÍPIU

Kondisaun estrada difikulta produtór agríkola Hatobuilico transporta produtu ba merkadu

Kondisaun estrada difikulta produtór agríkola Hatobuilico transporta produtu ba merkadu

Xefe suku Mulo, Cipriano de Andrade. Imajen TATOLI/Natalino Costa

AINARO, 11 jullu 2021 (TATOLI)—Grupu produtór agríkola hosi suku Mulo, postu administrativu Hatobuilico, munisípiu Ainaro, sente triste tanba kondisaun estrada ladun di’ak, halo produtu la folin tanba labele transporta ba merkadu.

“Ami atu lori modo mai sente labele tanba estrada sei a’at hela, ne’ebé se bele husu ba nai-ulun sira, karik bele hadi’a ami-nia estrada,” Komunidade suku Molo, Francisca Conçeicão, hateten ba Agência TATOLI, iha suku Molo, domingu ne’e.

Notísia relevante: MOP avalia ona dokumentu konkursu públiku estrada rurál munisípiu hitu

Durante ne’e, agrikultór sira prodús ambrulus, lis bombai, lis mutin no mean, fehuk ropa, mostarda, repollu no seluk tan.

“Dalan ladi’ak halo modo sira estraga de’it, kareta labele tama hodi sosa produtu ka transporta produtu ba merkadu,” nia subliña.

Iha fatin hanesan, Xefe suku Mulo, Cipriano de Andrade, hateten, suku ne’e iha aldeia Aitutu to’o Malmera maka kondisaun estrada ladi’ak.

“Estrada ne’ebé komunidade sira kestiona ne’e, iha tinan 2015, ha’u hatama ona proposta no konsidera kestaun ne’e hanesan ami-nia prioridade dahuluk, maibé to’o agora seidauk iha resposta hosi nasionál,” nia dehan.

Maski nune’e, autoridade lokál sei kontinua esforsu hodi hetan rezultadu.

“Agora ha’u hatama pedidu filafali hosi suku Mulo, ne’ebé segunda aban ha’u atu tuir fali enkontru atu halo apresiasaun ba proposta kona-ba ami-nia kondisaun estrada, ne’ebé tempu badak espera bele hadi’a,” Líder komunitáriu ne’e otimista.

Hatan ba kestaun ne’e, Sekretáriu Estadu Kooperativa (SEKoop), Elizário Ferreira, hateten, nia parte sei esforsu tenta parte kompetente iha nasionál hodi bele hetan rezolve kestaun ne’e.

“Ha’u sei reforsa atu hato’o pedidu ne’e ba Konsellu Ministru hodi haree,” nia promete.

Suku Molo iha aldeia haat ho totál populasaun 7.690.

Jornalista : Natalino Costa

Editora      : Julia Chatarina

iklan
iklan

Leave a Reply

iklan
error: Content is protected !!