BAUCAU, 12 jullu 2021 (TATOLI)–Estadu Unidu Amerika (EUA) liuhosi Embaixadór Estadu Unidu Amérika (EUA) ba Timor-Leste, Kevin Blackstone, kompremetidu atu kontinua apoia Timor-Leste, liuliu iha setór edukasaun.
“Estadu Unidu iha kompromisu atu apoia edukasaun ba labarik timor-oan no joven sira liuhosi projetu infraestrutura, programa formasaun ba manorin nain-sira, programa interkámbiu, bolsa no seluk tan,” Embaixador EUA hateten iha suku Seisal, postu administrativu Baucau, munisípiu Baucau, segunda ne’e.
Nune’e, nia parte sente haksolok tanba Forsa Navál EUA kompleta ona ninia projetu ba dala-102, ne’ebé hanesan parte ida atu fó kontribuisaun ba Timor-Leste durante tinan-sanulu nia laran.
“Amerikanu sira iha Forsa Navál Seabees, ne’ebé konstrui ona fasilidade eskola hodi serví jerasaun foun timor-oan sira no hakarak haree labarik sira uza fasilidade ida ne’e loron-loron,” nia akresenta.
Embaixadór EUA hamutuk ho Ministru Edukasaun, Juventude no Desportu (MEJD), Armindo Maia, akonpanã mos hosi autoridade munisípiu no lokál inaugura projetu konstrusaun Eskola ensinu baziku sekundária 3⁰ Siklu Seisal, ne’ebé konstrui hosi Forsa Navál EUA hamutuk sala aula tolu, ho totál orsamentu $353.000, ne’ebé sei benefisia estudante hamutuk 300.
Forsa Navál amerikanu, hahú tinan 2009, ho rotasaun servisu enjiñeiru kada fulan-neen, hadi’a infraestrutura edukasaun no saúde iha Timor-Leste.
Tuir alvu, iha tempu besik Forsa Navál Seabees sei kontinua konstrusaun sala aula haat iha ESP númeru 2 Baucau, ho estimasaun kustu $ 350.000.
Jornalista : Natalino Belo
Editora : Julia Chatarina
