LIQUIÇÁ, 12 jullu 2021 (TATOLI)—Sekretáriu Estadu Kooperativa (SEKoop), Elizário Ferreira, hateten, daudaun ne’e ekipa prepara hela joven 211 atu fila ba kampu hodi fortaleze kooperativa iha baze.
“Sekretaria Estadu Kooperativa iha programa ida naran prepara joven sira hodi fila ba kampu. Tanba ne’e, horiseik ami halo formasaun ida ba joven hamutuk 211, hodi kapasitasita sira fila ba ida-idak ninia munisípiu hodi serbisu ajuda dezenvolve kooperativa sira iha baze,” Sekretáriu Estadu informa ba Agência TATOLI, iha sede Kooperativa Konsellu Kombatente Libertasaun Nasionál (CCLN, sigla portugés) munisípiu Liquiçá, segunda ne’e.
Formasaun realiza durante loron-haat, hahú loron 12-15 jullu, ne’ebé iha postu ida reprezenta hosi joven na’in-rua.
Nune’e, hafoin formasaun, joven sira sei ajuda komunidade iha baze hodi halo kooperativa produsaun no dezenvolve kooperativa iha baze.
“Sira ne’e ami repara fila ba kampu no parte SEKoop sei insentiva no apoia formasaun ba sira,” nia subliña.
Iha tinan 2020, SEKoop konsege harii kooperativa produsaun hamutuk 62 inklui hamoris kréditu uniaun 22.
Entre postu administrativu 67 iha territóriu, 33 maka seidauk iha kooperativa, enkuantu postu administrativu 34 iha ona.
Daudaun SEKoop hahú atu hadi’a kooperativa ne’ebé eziste no haree fatin ne’ebé seidauk iha sei harii, nune’e postu administrativu ida bele iha kooperativa.
Jornalista : Natalino Costa
Editora : Julia Chatarina
