Tinan ne’e, suku neen iha Manufahi sei asesu eletrisidade

DILI, 13 jullu 2021 (TATOLI)-Administradór Munisípiu Manufahi, Arantes Isaac Sarmento informa, tinan ne’e, suku neen iha Munisípiu Manufahi sei asesu liña eletrisidade.
Notísia Relevante : 79% populasaun Manufahi asesu bee-moos ho sufisiente
Iha Munisípiu Manufahi to’o agora suku ne’ebé seidauk asesu eletrisidade hamutuk suku 14, no uma-kain 9.581.
“Planu VIII Governu nian, tinan ne’e, prioridade sei fó ba suku ne’ebé seidauk asesu eletrisidade.Tinan ne’e, ami-nia munisípiu iha suku neen mak sei asesu liña eletrisidade,” Arantes Isaac Sarmento, informa bá Agência Tatoli liuhosi telefónika, tersa ne’e.
Nia afirma, suku neen ne’ebé tinan ne’e atu implementa uluk mak, Suku Tutuloro, Letefoho, Grotu, Dotik, Suku Liurai ho Mindelo.
“Tuir Prezidente Eletrisidade de Timor-Leste, Empreza Públiku (EDTL, E.P) katak antes ramata fulan dezembru, tinan ne’e, komunidade suku neen refere tenke asesu ona bá liña eletrisidade, no suku sira seluk ne’ebé seidauk asesu ne’e ba planu tinan oin,” nia haktuir.
Jornalista : Arminda Fonseca
Editór : Francisco Simões

