BAUCAU, 13 jullu 2021 (TATOLI)–Diretór Servisu Agrikultura munisípiu Baucau, Moises Lobato Pereira, hateten maioria tratór iha Baucau a’at hotu, hela de’it sia mak utiliza ba atendimentu servisu argrikultór.
“Susar tebes atu dehan sufisiente, hanesan ema karik katuas hotu ona, tratór hirak ne’e mai iha IV Governu nia tempu iha tinan 2008 to’o agora, maibé nia manutensaun susar no osan kiik, enkuantu ekipamentu karun tenki sosa hosi kompañia,” Diretór informa iha ninia knaar fatin, Villa nova, tersa ne’e.
Moises esplika, daudaun ne’e iha tratór sia mak distribui ba agrikultór sira hodi fila rai iha rai-maran hodi prepara ba udan-been monu, rai hanesan iha parte postu admistrativu Laga, Samalari inklui Gariuai no seluk tan bazeia ba proposta hosi komunidade.
“Iha sia mak sei utiliza ba serbisu, maibé barak liu mak ladi’ak no labele uza ona,” nia akresenta.
Daudaun ne’e prepara ona proposta ba Ministériu Agrikultura no Peska (MAP) nasionál liuhosi pedidu atu hadi’a tratór ne’ebé presiza atu halo manutensaun, maibé desizaun hotu iha nasionál.
Nia konsidera presiza kustu boot atu halo manutensaun tratór tanba ekipamentu ne’e bazeia ba kompañia fornesidór ne’ebé hatama sasán.
“Osan boot demais no Governu haree kuaze munisípiu 12 inkui Rejiaun Administrativa Espesiál Oé-cusse Ambeno (RAEOA) ne’ebé osan mai sira halo reparasaun kiik-oan,” nia hatutan.
Totál tratór iha munisípiu Baucau hamutuk 28, sia mak sei operasionaliza enkuantu hitu posivelmente sei bele hadi’a.
Jornalista : Natalino Belo
Editora : Julia Chatarina
