DILI, 14 jullu 2021 (TATOLI)—Koordenadór distribuisaun Cesta Bázika hosi Sekretaria Estadu Kooperativa (SEKoop), Tomas Ximenes, konsidera implementasaun programa Cesta Bázika fó efeitu pozitivu ba agrikultór sira no motiva bele prodús barak liután.
“Observasaun jerál, programa ne’e fó impaktu estimula ekonomia produtivu sira no hasa’e produsaun iha área potensiál, hanesan hare no batar sa’e iha área Iliomar, Uatucarbau, Uatulari, no fatin seluk tan. Agrikultór balun nia hare tinan tolu ka haat laduun folin maibé ho Cesta Básika kompañia mai sosa hotu,” Koordenadór distribuisaun informa ba Agência TATOLI, iha ninia knaar fatin, Acait, kuarta ne’e.
Bazeia ba peskiza hosi Ministériu Koordenadór Asuntu Ekonómiku (MKAE), United Nations Development Programme (UNDP) no Programa Ai-han Mundiál (WFP, sigla inglés) kona-ba impaktu sosiu ekonomia, nota katak Cesta Bázika iha efeitu pozitivu ba agrikultór sira.
“Uluk seidauk iha programa, ema laduun halo natar no kuda batar, maibé agora ema hahú atividade ne’e barak liután. Natar ne’ebé uluk ema abandona de’it, agora sira halo hotu ona no bele motiva produsaun,” nia akresenta.
SEKoop distribui iha munisípiu hitu ba benefisiáriu 436.483
Hanesan instituisaun implementadór programa Cesta Bázika, SEKoop kontrata kompañia distributór atu sosa produtu agrikultór no fahe ba munisípiu hitu hanesan Aileu, Ainaro Covalima, Manufahi Manatutu Liquicá no Lautém.
“Parte SEKoop nia distribuisaun hotu ona fulan kotuk, ho totál benefisiáriu ne’ebé hetan ona produtu hamutuk 436.483,” Koordenadór informa.
Notísia relevante: Uma-kain 167 iha suku Cassa Ainaro rejeita simu Cesta Bázika
Nia haktuir, difikuldade durante prosesu distribuisaun maka dadus hosi parte kompetente.
“Buat hotu la’o di’ak maibé difikuldade durante diatribuisaun maka dadus hosi Ministériu Administrasaun Estatál (MAE), hosi ficha família la hanesan no dezafiu jerál maka komunidade balun la’ós hakarak produtu ai-han maibé hakarak liu osan,” nia hatutan.
Hosi parte SEKoop, suku balun iha Ainaro maka seidauk simu produtu Cesta Bázika tanba komunidade la satisfaz ho kuantidade produtu.
“Komunidade sira iha suku Cassa maka seidauk simu, ein prinsípiu ami halo ona aproximasaun dala hira ho Xefe suku no aldeia, inklui Administradór postu, maibé sira nafatin lakohi simu, ita labele obriga tanba ema-nia direitu, ita fó fali ba ema seluk ne’ebé hakarak tanba iha dekretu Governu mós la obriga,” nia tenik.
Jornalista : Natalino Costa
Editora : Julia Chatarina
