DILI, 14 jullu 2021 (TATOLI)—Atuál Komisáriu Komisaun Nasionál Eleisaun (CNE, sigla portugés) no Reitór Universidade Dili (UNDIL), José Agostinho da Costa Belo, kuarta ne’e eleitu sai Prezidente Komisaun Nasionál Eleisaun ba mandatu tinan lima hodi troka Alcino de Araújo Barris.
Rezultadu votasaun liuhosi eskrutíniu sekretu ne’e kandidatu Alcino de Araújo Barris hetan votu 29 no kandidatu José Agostinho da Costa Belo hetan votu 35, nune’e kandidatu hosi Bankada PLP nian sai nu’udar Prezidente CNE foun.
Notísia Relevante: Aban, PN sei hili membru efetivu no suplente ba CNE
“Nune’e, meza anúnsia rezultadu votasaun Prezidente CNE ba períodu 17 agostu 2021 ba oin ho mandatu tinan lima. Dejeza bom traballu no susesu ba Prezidente CNE foun ho komisáriu foun ne’ebé ohin ita hili,” Prezidente Parlamentu Nasionál, Deputadu Aniceto Longuinhos Guterres Lopes, anúnsia liuhosi plenária, kuarta ne’e.
Liuhosi votasaun eskrutíniu sekretu, José Pedro Mariano Neves de Camões hetan votu 39 nune’e sai suplente dahuluk, Fernanda de Fátima Sarmento Ximenes, hetan votu 35 sai nu’udar suplente daruak no Querubin Jong Ferreira, hetan votu 33 nune’e sai suplentu datoluk.
Entretantu lista membru ne’ebé dezigna ona hosi órgaun kompetente ba CNE mak hanesan Prezidente Repúblika nomea ona Olávio da Costa Monteiro de Almeida nu’udar membru efetivu ba CNE no Detaviana Madalena Guterres Freitas, nu’udar membru suplente. Ne’e previstu iha dekretu Prezidente Repúblika númeru 41/2021, 1 jullu.
Carlito Martins nomea hosi Governu nu’udar membru efetivu no Elvino Bonaparte do Rêgo, nu’udar membru suplente (karta ofisiál haruka iha loron 9 jullu 2021).
Purtantu Majistradu judisiál Antonino Gonçalves eleitu nu’udar membru efetivu no João Ribeiro nu’udar suplemente, ne’e dezigna hosi Tribunál Rekursu, ne’ebé haruka iha loron 30 juñu 2021.
Majistradu hosi Ministériu Públiku, Domingos Barreto eleitu nu’udar membru efetivu no Napolião Soares da Silva nu’udar membru suplente (karta ofisiál haruka iha loron 5 jullu 2021).
Bazea ba lei órgaun administrasaun eleitorál katak, Prezidente Parlamentu Nasionál mak sei fó pose hafoin dezignasaun.
Entretantu iha aprezentasaun kandidatu ba membru efetivu ne’e, Bankada FRETILIN propoin Alcino de Araújo Báris (atuál prezidente CNE), Bankada CNRT propoin Odete Maria Belo (atuál komisária CNE) no Bankada PLP propoin José Agostinho da Costa Belo (atuál komisáriu CNE).
Purtantu Bankada CNRT nia kandidatu la kompete iha eleisaun ba prezidente CNE foun, maibé kandidatu hosi Bankada FRETILIN, Alcino de Araújo Barris (atuál prezidente CNE) no Bankada Partidu Libertasaun Populár (PLP) José Agostinho da Costa Belo mak kompete iha eleisaun ne’e.
Entretantu, kona-ba membru suplemente sira Bankada Partidu Demokrátiku (PD) propoin José Pedro Camões (advogadu), Bankada KHUNTO propoin Querubin Jong Ferreira, Bankada Frente-Mudança (FM) propoin Fátima Sarmento Ximenes, nu’udar membru Konsellu Pegagójiku no Sientífiku iha DLP, no Bankada Uniaun Demkorátika Timorense (UDT) propoin Octavio Manuel da Costa Amaral (advogadu).
Jornalista : Evaristo Soares Martins
Editór : Cancio Ximenes
