MAE fó teste entrevista bá kandidatu Administradór Postu Suai Vila ho Zumalai
COVALIMA, 14 jullu 2021 (TATOLI) – Membru ekipa juri hosi Ministériu Administrasaun Estatál (MAE) fó teste entrevista bá kandidatu administradór-sira ne’ebé kompete bá iha vaga administradór postu administrativu Suai Vila ho Zumalai.
“Ami hala’o teste ba kandidatu administradór la’ós de’it iha Munisípiu Covalima, maibé iha munisípiu hotu. Bá dahuluk, ita hala’o iha Postu Zumalai ho Suai Vila tuir faze,” membru juri hosi MAE, José Magno, informa bá jornalista iha ámbitu fó teste bá kandidatu bá vaga administradór postu Suai Vila ho Administradór Zumalai iha salaun Administrasaun Covalima, kuarta ne’e.
Prosesu ne’e liu hodi faze avaliasaun dokumentu, teste eskrita no mós faze da-toluk teste entrevista.
Kandidatu ne’ebé mak konkorre vaga bá Administradór Postu Suai Vila iha kandidatu na’in-hat no hosi númeru ne’e kandidatu na’in-tolu (3) mak aprovadu no bá postu Zumalai na’in-lima (5) no hosi númeru ne’e na’in-hat (4) mak tuir prova eskrita no entrevista.
Tuir dekretu lei númeru 3/2016, segundu alterasaun 54/2020 ba kandidatu ne’ebé aprovadu iha vaga ne’e mandatu ba tinan-haat (4).
Kandidatu Administradór Postu Zumalai, Rui dos Santos hateten, nia parte submete tuir prosesu hotu no desizaun finál iha juri nia kompeténsia.
“Ha’u ho fuan boot prontu simu rezultadu ne’ebé fó sai hosi ekipa juri,” Rui dos Santos hateten
Jornalista : Celestina Teles
Editór : Francisco Simões
