OÉ-CUSSE, 15 Jullu 2021 (TATOLI)—Dirasaun Rejionál Infraestrutura (DRI) Rejiaun Administrativa Espesiál Oé-Cusse Ambeno (RAEOA) liuhosi Departamentu Ponte no Estrada aloka ona millaun $29 hosi fundu kapitál dezenvolvimentu atu halo reabilitasaun, melloramentu no manutensaun ba estrada rurál iha Sub-Rejiaun Nitibe, Oésilo, Pante Makasar no Pasabe.
Notísia Relevante: Autoridade RAEOA hato’o razaun ezekusaun OJE 2021 ba PM
“Ami-nia prioridade mak halo reabilitasaun no manutensaun ba estrada no melloramentu estrada rurál. Seluk mak aumenta tan ba rede distribuisaun eletrisidade ba bairru izoladu sira inklui uza ba problema bee-moos hodi apoiu emerjénsia iha situasaun COVID-19 nian,” Diretór Dirasaun Rejionál Infraestrutura, Kandido dos Reis Amarál, informa ba Agência Tatoli iha nia servisu fatin, Pante Makasar, Oé-Cusse, kinta ne’e.
Normalizasaun ba kontrusaun estrada rurál ne’e, Departamentu Ponte no Estrada sei reabilita estrada rurál kilometru 24 iha Bihala, suku Bobokase sa’e ba aldeia Kutete, iha suku Costa, sub-rejiaun Pante Makasar, no iha aldeia Quibiselo ba postu UPF Faotbasin, suku Bobometo, sub-rejiaun Oésilo depois kontinuasaun hosi Kusi, suku Ban-Afi, sub-rejiaun Nitibe ba suku Malelat, sub-rejiaun Pasabe
Prosesu ba reabilitasaun daudaun ne’e halo ona submisaun ba Prezidente Autoridade no hetan ona aprovasaun. Agora, haruka ona ba parte aprovizionamentu, nune’e semana oin bele lansa ona konkursu.
Aleinde ne’e, nia dehan, iha tinan ne’e Unidade Institutu Jestaun Ekipamentu sei halo melloramentu estrada iha sub-rejiaun Oésilo iha bairru Bitopa, aldeia Buqui, suku Usitasae liga ba bairru Paut, aldeia Oébaha, suku Bobometo.
Hafoin ida-ne’e, nia informa, kontinua ba iha suku Lela-Ufe hosi aldeia Bebo ba Netembitimo, sub-rejiaun Nitibe no kontinua tun mai to’o aldeia Maunaben, suku Cunha, sub-rejiaun Pante Makasar.
Ezekusaun ba projetu hirak ne’e sei involve mös kompañia sira inklui Institutu Jestaun Ekipamentu (IJE), tanba unidade jestaun ekipamentu sira só atende de’it servisu emerjensia sira no melloramentu estrada.
Entretantu Xefe suku Lela-Ufe, sub-rejiaun Nitibe, José Neno Sila, hateten nu’udár autoridade lokál hein hela bainhira mak projetu ne’e hahú. Tanba, tuir nia, reabilitasaun no melloramentu ba estrada rurál importante ba komunidade, nune’e bele transporta sira-nia produtu lokál ba faan iha merkadu.
“Ekipa mai halo ona identifikasaun atu hadi’a estrada iha ha’u-nia suku hosi Nunu-Ana ba aldeia Maunaben, hosi aldeia Bebu ba aldeia Mahata no hosi Nun-Ana ba liga suku Usitaco. Problema iha tempu udan ne’e, ha’u-nia komunidade susár transporta sasán ba merkadu inklui estudante sira labebele asesu ba eskola tanba mota boot,” nia dehan.
Notísia Relevante: MOP RAEOA aloka rihun $42 mellora estrada foun iha Oésilo
Jornalista : Abilio Elo Nini
Editór : Cancio Ximenes
