AILEU, 15 jullu 2021 (TATOLI) – Sekretáriu Estadu Juventude no Desportu (SEJD), Abrão Saldanha, kinta ne’e, vizita Eskola Ensinu Tékniku Vokasionál (ETV) Aileu hodi haree estudante sira-nia kriatividade iha área ortikultura.
Notísia Relevante : SEJD sei dezenvolve desportu komunitáriu iha Aileu
“Iha area agrikultura nia eskola id- ne’e di’ak tebes tanba iha pratika aula no pratika mós agrikultura hanesan kuda-modo no ai-fuan sira iha resintu eskola nian,” Abrão Saldanha hateten bainhira ko’alia ho estudante no profesór sira ETV Aileu.
Nia enkoraja nafatin estudante hirak ne’e atu nafatin atividade ne’ebé iha hodi fó vantajen di’ak ba sira-nia moris iha futuru.
Iha fatin hanesan, Diretór ETV Aileu, Luciano de Araújo hateten, buat hotu ne’ebé estudante sira halo iha eskola ne’e tanba inisiativa estudante nian rasik.
“Estudante sira iha ne’e tempu sira pratika iha aula sira tuir aula, maibé oras laiha aula sira tenke ba iha sira-nia to’os hodi haree ai-horis sira,” Luciano de Araújo tenik.
Totál estudante ativu agora daudauk iha ETV Aileu hamutuk na’in-301, professor na’in-21 maioria permanente.
Eskola refere harii iha 2007 to’o ohin loron kompostu hosi eskola rua ho sala aula hamutuk ualu (8), oráriu ba estudante sira tama aula balun dadeer no balun loraik tuir kapasidade aula ne’ebé menus.
Jornalista : Hortencio Sanchez
Editór : Francisco Simões
