DILI, 15 jullu 2021(TATOLI)–Diretór Jerál Sekretaria Estadu Formasaun Profisionál no Empregu (SEFOPE), Paulo Alves, hateten iha traballadór hosi Seasonal Worker Programme (SWP) Austrália maka kontratu remata ona.
“Kontratu SWP ba fulan neen de’it, hosi númeru traballadór timor-oan 1.300 resin, traballadór 280 kontratu ramata ona no halai ses hosi sistema, tanba ne’e uza de’it viza protesaun,” Diretór informa iha salaun Komisaun Nasionál Eleisaun (CNE, sigla portugés), Colmera, kinta ne’e.
Traballdór hirak ne’e tuir loos mai ona Timór, maibé sira buka vistu protesaun ou vistu 480 ne’ebé Austrália fó ba sira hodi bele livre buka serbisu iha ne’ebá.
Maski nune’e, SEFOPE kontinua serbisu hamutuk ho Governu australianu liuhosi Embaixada iha Timor-Leste atu repatria timor-oan sira.
“Ita-nia esforsu mak komunika ho reprezentante Austrália iha ne’e, ita ko’alia bebeik ona ho sira inklui ita-nia Embaixada iha ne’ebá mós ita ko’alia, maibé nafatin hasoru problema, tanba iha vistu protesaun, Polísia imigrasaun Austrália la kaer sira, tanba ne’e sira nafatin iha ne’ebá,” nia akresenta.
Tanba ne’e, SEFOPE nafatin komunika ho família traballadór sira hodi aprosima timor-oan sira iha atu kansela vistu protesaun, nune’e bele fila hikas mai.
Jornalista : Natalino Costa
Editora: Julia Chatarina
