COVALIMA 15 jullu 2021 (TATOLI) –Instalasaun ba liña distribuisaun eletrisidade iha Suku Dato Rua ho Suku Aitos, Postu Administrativu Fohorem, Munisípiu Covalima, finaliza ona, maibé seidauk iha enerjia ka seidauk funsiona tanba instalasaun ne’e laiha termu kontratu hosi Eletrisidade Timor-Leste, Empreza Púbiku (EDTL,E.P).
“Iha suku ne’ebé instala ona eletrisidade, maibé seidauk lakan tanba laiha kontratu, nune’e EDTL,E.P labele foti desizaun ahi bele lakan,” Supervisor EDTL,E.P Covalima, António Mali informa ba jornalista iha nia kna’ar fatin iha Covalima, kinta ne’e.
Molok ne’e, komisáriu ezekutivu EDTL, E.P, Latino Jerónimo mós klarifika, eletrisidade iha suku Dato rua, maske instala hotu ona, maibé seidauk lakan tanba laiha dokumentu kontratu servisu.
“Ami labele halo lakan maibé ami tenke buka meius legál hodi lansa ba konkursu públiku , bainhira kompañia durante halo instalasaun mak manan nia kontinua, maibé kompañia seluk mak manan bele reembolsa osan kompañia nian,” Latino Jerónimo hateten.
EDTL,E.P sei dada eletrisidade ba komunidade iha Suku Laktos, Mape no Usekai iha Munisípiu Covalima.
Jornalista : Celestina Teles
Editór : Francisco Simões
