CPD-RDTL husu PNTL labele impede programa hasa’e bandeira iha Covalima
COVALIMA, 19 jullu 2021 (TATOLI) –Komandante Polísia Nasionál Timor-Leste (PNTL) Munisípiu Covalima, António Maria de Sá, fó sai ona deklarasaun hodi la autoriza organizasaun CPD-RDTL FRETILIN Movimentu, Unijam ativista pro RDTL atu hasa’e bandeira RDTL iha territóriu Munisípiu Covalima.
Refere ba orientasaun Komandante Polísia Covalima nian ne’e, porta-voz CPD-RDTL Covalima, Rosalino Cardoso, segunda ne’e, liuhosi konferénsia imprensa, husu ba PNTL atu labele impede programa CPD-RDTL atu hasa’e bandeira iha territóriu Covalima.
“Ami husu ba maluk polísia sira nia patriotizmu no nasionalizmu di’ak liu koopera ho Tribunál hakru’uk ba desizaun hodi la bele impede programa CPD-RDTL FRETILIN Movimentu Unijma ativista Pro RDTL, atu hasa’e bandeira iha territóriu Covalima,” Rosalino Cardoso afirma.
Programa CPD-RDTL FRETILIN Movimentu Unijma atu hasa’e bandeira iha territóriu Covalima relasiona selebrasaun loron FALINTIL, 20 agostu, tinan ne’e. tanba ne’e, sira hotu atu PNTL atu bele garante seguransa ba komunidade sira la’ós bandu fali serimónia hasae bandeira hodi komemora loron istóriku FALINTIL nian iha Covalima.
Jornalista : Celestina Teles
Editór : Francisco Simões
