iklan

COVALIMA, MUNISÍPIU, SAÚDE

MS selebra loron nasionál saúde ho atividade diálogu aberta

MS selebra loron nasionál saúde ho atividade diálogu aberta

Ministra Saúde, Odete Maria Freitas Belo, halo dialogu aberta ho komunidade Zumalai, Munisípiu Covalima hodi selebra mós loron nasionál saúde ba dalima, tersa (20/07/2021). Imajen Tatoli/Celestina Teles

COVALIMA, 20 jullu 2021 (TATOLI) – Ministra Saúde (MS), Odete Maria Freitas Belo, ho nia ekipa, tersa ne’e, halo diálogu ho komunidade Suku Lepo, Postu Administrativu Zumalai, Munisípiu Covalima, hodi partilla informasaun ho komunidade kona-ba COVID-19 ho nia métodu prevensaun sira.

Diálogu ne’ebé asiste mós hosi autoridade aldeia, suku, postu administrativu no munisípiu ne’e hodi selebra mós loron nasionál saúde ba dalima.

“Loron saúde nasionál monu iha sitasaun COVID-19. Ami  hakarak lori informasaun COVID-19 no  vasina ne’ebé mak iha atu esplika ba ita-nia povu,” Ministra Saúde Odete Maria Freitas Belo, hateten.

Ho prezensa Ministra Saúde nian ne’e mós lori kedas ho ekipa saúde sira hodi halo konsulta jerál, marxa saudavel divertimentu oioin no misa agradesimentu.

Oportunidade ne’e, reprezentante Administradór  Munisípiu Covalima, Afonso Nugueira Nahak,  halo apelu ba komunidade Suku Lepo tenke vasina tanba ho vasina mak solusaun  úniku hodi hakotu siklu visiozu (lingkaran setan) propagasaun COVID-19.

“Bainhira vasina ona, kontinua kumpre regra saúde públiku ba prevensaun COVID-19, hanesan sai hosi uma ba li’ur tenke uza máskara, fase-liman beibeik ho sabaun, evita halibur malu ho ema barak no la bele haku’ur fronteira terrestre ilegálmente tanba variante foun sa’e maka’as iha nasaun viziñu,” Afonso Nugueira Nahak  afirma.

Xefe  Sentru Saúde Zumalai,  Rui Amaral  hateten, hafoin pesoál saúde halo sensibilizasaun kona-ba vasina, abitante iha sentru saúde Zumalai  entuziazmu  simu vasina hodi hasa’e sira-nia imunidade iha luta foun kontra inimigu invizivel COVID-19.

To’o oras ne’e, abitante iha Zumalai hamutuk 1.836 maka simu ona vasina AstraZeneca.

Husu  aumenta pesoál saúde iha postu saúde

Liuhosi diálogu ne’e, autoridade lokál Munisípiu Covalima nian husu ba Governu liuhosi Ministra Saúde, Odete Maria Freitas Belo, atu aumenta pesoál saúde  iha postu saúde sira ne’ebé estabelese ona iha Postu Administrativu Zumalai, Munisípiu Covalima

“Ami rasik iha postu saúde ida iha Suku Lepo ne’e, maibé ami iha de’it pesoál saúde ida de’it hodi atende komunidade aldeia lima ho total abitante 2.338. Tanba ne’e, ami rekomenda atu bele aumenta tan pesoál saúde mai ami nia postu saúde sira,” Xefe Suku Lepo, Aniceto Pereira hateten.

Xefe Sentru Saúde Postu Zumalai, Rui Amaral rasik  rekoñese iha oostu saúde no sentru saúde sira iha postu Administrativu Zumalai menus  rekursu tanba ne’e presiza atu aumenta.

Normálmente iha postu saúde ida presiza iha médiku ida, enfermeiru ka enfermeira na’in rua atu bele fó atendimentu ho di’ak no lalais ba komunidade bainhira komunidade presiza.

Hatán ba rekomendasaun sira ne’e, Ministra Odete Maria Freitas Belo, informa, ho rekursu sira ne’ebé limitadu, maka Ministériu Saúde halo ona rekrutamentu  ba pesoál saúde sira atu bele destaka ba suku ho munisípiu sira.

Jornalista       : Celestina Teles

Editór             : Francisco Simões

iklan
iklan

Leave a Reply

iklan
error: Content is protected !!