DILI, 21 jullu 2021 (TATOLI)--Ministru Petróleu no Minerál, Víctor da Conceição Soares, fó ona instrusaun ba ekipa legál ministériu hodi analiza legalidade ezbosu estatutu harii empreza estatál iha setór minieru.
“Ezbosu uluk tau naran Murak Rai Timor, S.A ne’ebé Konsellu Ministru (KM) aprova iha 2017, maibé momentu ne’ebá Prezidente Repúbika veta. Nune’e, parte legál komesa haree atu atualiza hodi avansa hanesan Timor Gás no Petróleu, Empreza Públika (Timor GAP, E.P), maibé rekolla reseita iha setór minerál metáliku no naun metáliku de’it,” Ministru Víctor hateten ba Agência TATOLI, iha Palásiu Governu, kuarta ne’e.
Antes ne’e, Governu liuhosi reuniaun KM aprova proposta Dekretu Lei ne’ebé aprezenta hosi Ministru Estadu no Ministru Rekursu Minerál, Mariano Asanami Sabino (VII Governu) kona-ba kompañia Murak Rai Timór, S.A.
Notísia relevante: Governu Aprova Dekretu Lei Atividade Kompañia Murak Rai Timor, SÁ
“Agora seidauk sarani foun, sei diskute hela atu deside mantein naran ka troka, maibé importante ita harii empreza minieru ida atu rekolla osan,” nia akresenta.
Empreza ne’e sei permite operasaun setór mineiru, ne’ebé bele sai fonte redimentu nasionál no aumenta empregu ba sidadaun sira.
“Ha’u hanoin fulan ikus tinan ne’e bele harii ona empreza estatál,” nia otimizta.
Inisiativa ne’e tama iha estratejia Governu kona-ba harii instituisaun ne’ebé garante dezenvolvimentu setór ekonómiku no iha ponténsia boot hodi kontribui ba diversifikasaun ekonomia ne’ebé fundamentál.
Empreza estatál ne’e sei halo atividade peskiza, avaliasaun, dezenvolvimentu, esplorasaun no tratamentu halo prosesamentu refinasaun inklui komersializasaun rekursu minerál.
Jornalista : Florêncio Miranda Ximenes
Editora : Julia Chatarina
