COVALIMA, 21 jullu 2021 (TATOLI) – Ministériu Saúde (MS) sei halo lansamentu kampaña konjunta munisipál vasinasaun COVID-19 iha Munisípiu Covalima.
Notísia Relevante : Atividade desportiva ho marxa saudavel iha loron nasionál saúde
“Ami sei halo lansamentu nasionál ba vasinasaun COVID-19 iha Covalima no sei integra ba ekipa munisípiu hodi koloka ba postu vasina sira,” Diretora Jerál Prestasaun Saúde, Odete da Silva Viegas, informa ba jornalista iha Covalima, kuarta ne’e
Nia husu ba autoridade lokál atu mobiliza komunidade, nune’e komunidade bele vasina iha postu vasina sira.
“Iha Munisípiu Covalima, ita halo tratamentu oinsá seluk, nia kuantidade vasina sa’e liu ita fó vasina 20.000 doze, ita hakarak total populasaun simu vasina 20% to’o 80% liu tanba variante delta to’o ona iha ita-nia nasaun viziñu Indonézia no ita presiza tau atensaun másimu,” Odete hateten.
Administradór Postu Suai Vila, Laurentino de Jesus Paiva hateten, sei fó orientasaun ba Xefe Suku atu mobiliza komunidade sira vasina atu bele hasa’e komunidade sira-nia imunidade iha luta foun kontra inimigu invizivel variante delta.
“Ami rona ona informasaun hosi parte saúde husu ami atu mobiliza komunidade sira vasina hodi bele atinje meta hosi Ministériu Saúde, nune’e Covalima bele livre hosi peste letál COVID-19,” nia tenik.
Jornalista : Celestina Teles
Editór : Francisco Simões
