OÉ-CUSSE, 21 Jullu 2021 (TATOLI)—Populasaun uma kain 200-resin iha aldeia Manan, suku Bene-Ufe, sub-rejiaun Nitibe, husu Guvernu liuhosi autoridade RAEOA atu konstrui projetu perfurasaun sistema bee-moos tanba tinan barak sira uza de’it bee-matan ida hodi asesu bee-moos.
Notísia Relevante: Arsenio Bano: “Ha’u-nia prioridade hakarak rezolve problema bee-moos iha Oé-Cusse”
“Ha’u husu ba Guvernu liuhosi autoridade RAEOA atu konstrui perfurasaun sistema bee-moos ida iha ami nia suku liu-liu iha aldeia Manan, suku Bene-Ufe. Iha ne’e bee-matan ida maibé la sufisiente atu kobre hotu komunidade uma kain 200-resin ne’e,” Xefe suku Bene-Ufe, Marcos Meni, hato’o preokupasaun ne’e iha serimónia inaugurasaun kuarentena iha aldeia Manan, suku Bene-Ufe, sub-rejiaun Nitibe, kuarta ne’e.
Tanba ne’e, nia dehan, iha semana oin ne’e komunidade sei submete proposta ba Prezidente Autoridade RAEOA no hein katak bele hetan aprovasaun hodi konstrui perfurasaun sistema bee-moos.
Xefe juventude suku Bene-Ufe, Agustinho Afulit, hateten aleinde akontese problema bee-moos iha aldeia Manan, akontese mós problema bee-moos iha aldeia seluk ne’ebé parténsia ba suku Bene-Ufe tanba populasaun sira hobuur de’it bee-matan ida hodi kuru no fase roupa.
“Bee-matan iha aldeia Manan iha duni maibé la sufisiente tanba komunidade barakliu. Loro-loron mak sira hobur de’it bee-matan ida de’it no bee-matan ne’e uza ba hemu no uza mós ba fase roupa no fó hemu mós ba animal. Problema bee-moos la’ós akontese de’it iha aldeia Manan maibé iha aldeia (2) seluk mós susar atu asesu ba bee-moos. Preokupasaun ne’ebé xefe suku hatoo ne’e loos duni,” nia dehan.
Hatán ba preokupasaun ne’e, Prezidente Autoridade RAEOA Arsénio Paixão Bano hateten autoridade daudaun ne’e kria ona programa ida naran ‘Suku Amasat’ atu dezenvolve suku ida-idak tuir proposta kada suku no sei hetan apoiu hosi autoridade.
“Proposta hosi xefe suku Bene-Ufe, ita sei haree tanba iha fulan oin no fulan idane’e nia laran, Oé-Cusse ne’e ita hahú ona programa Suku Amasat. Ami sei konvida xefe suku no jestór sira hotu atu diskute ba planu prioridade saida mak sei halo iha suku ida-idak ho nia fundu sei hetan apoiu hosi autoridade,” nia hateten.
Programa ‘Suku Amasat’ ne’e, autoridade sei aloka ba kada suku hetan rihun $20 atu haree ba programa sira iha suku hanesan área saúde, aktividade sosiál, no agríkultura nian, ne’ebé xefe suku sira atu define prioridade iha nivél suku oinsá mak atu harii.
Entretantu iha tinan ne’e, autoridade RAEOA konstrui ona projetu perfurasaun sistema bee-moos hitu (7) ne’ebé konstrui iha sub-rejiaun Nitibe hamutuk fatin rua (2), ida iha suku Lela-Ufe no ida iha suku Suni-Ufe.
Enkuantu totál populasaun iha suku Bene-Ufe hamutuk 3.172, ne’ebé kompostu hosi aldeia Manan hamutuk 1.237, iha aldeia Lamasi 757 no aldeia Citrana 1.178.
Notísia Relevante: PA RAEOA lansa primeira pedra ba perfurasaun bee-moos iha Nitibe
Jornalista : Abilio Elo Nini
Editor : Cancio Ximenes
