DILI, 22 jullu 2021 (TATOLI)—Governu konsidera armazen Serbisu Autónomu Medikamentu no Ekipamentu Saúde (SAMES), importante atu bele rai hodi asegura ai-moruk hotu-hotu ne’ebé tama mai hosi rai-liur, nune’e bele distribui hikas ba Timor laran tomak.
Konsiderasaun ne’e hato’o hosi Vise-Primeira Ministra, Armanda Berta dos Santos, bainhira hala’o vizita hodi haree direta kondisaun reál armazen sentrál SAMES, iha Kampaung Alor, kinta ne’e.
Notísia relevante:SAMES kontrata kompañia rua hodi fornese oksijéniu
“Ha’u-nia vizita ne’e atu haree direta vasina COVID-19 ne’ebé durante ne’e parseiru-sira apoia ba ita no mós haree kona-bá stock out ai-moruk sira seluk ,” Armanda Berta dos Santos esplika.
Iha fatin hanesan, Diretór Interinu SAMES, Francisco Borges, agradese ba disponibilidade Vise-Primeira Ministra hodi haree no rona rasik situasaun saida mak SAMES esfrenta liuliu kona-bá preparasaun ba distribuisaun vasina iha tempu badak.
Francisco Borges mós aprezenta difikuldade hanesan rekursu umanu ne’ebé Governu presija konsidera, inklui tékniku profisionál atu bele hadi’a di’ak liu tán serbisu iha SAMES.
Jornalista: Felicidade Ximenes
Editór: Cipriano Colo
