OÉ-CUSSE, 22 Jullu 2021 (TATOLI)—Prezidente Autoridade (PA) Rejiaun Administrativa Espesiál Oé-Cusse Ambeno (RAEOA), kinta ne’e hala’o vizita traballu ba haree komunidade iha aldeia Manuimpena, suku Lalisuk, sub-rejiaun Pante Makasar, no kontinua enkoraja sira hodi partisipa simu vasina atu bele hasae imunidade hasoru moras COVID-19.
Notísia Relevante: Autoridade RAEOA lansa vasina Sinovac doze dahuluk
“Vasina ne’e importante ba ita- tanba hasa’e ita-nia imunidade hodi kontra moras COVID-19. Ha’u husu ba líder lokál sira atu fó hatene komunidade sira labele tauk simu vasina. Estadu simu ajuda aimoruk vasina nian ho gratuita, ne’e duni labele tauk atu simu,” Arsénio Paixão Bano ko’alia lia hirak ne’e bainhira hala’o vizita traballu ba komunidade sira iha aldeia Manuimpena, kinta ne’e.
Bainhira simu ona vasina, nia sujere rai didi’ak kartaun vasina tanba ne’e hanesan pasaporte ba movimentu rai laran tanba Oé-Cusse tenke livre hosi COVID-19, no daudaun ne’e Oé-Cusse sei sai zona verde.
Xefe aldeia Manuimpena, Agustinho Cofitalan, hateten molok ekipa saúde rejionál atu hala’o vasinasaun ba komunidade aldeia refere, nia parte konvida uluk komunidade sira partisipa iha vasinasasun ne’e, tanba nu’udar autoridade lokál iha obrigasaun atu informa ba komunidade, nune’e komunidade bele partisipa másimu.
Dadús provizoriu iha RAEOA, totál populasaun ne’ebé simu ona vasina AstraZeneca doze primeiru hamutuk 6.091 kompostu hosi mane na’in 3.150 no feto na’in 2.941, no hirak ne’ebé simu ona doze daruak hamutuk 1.499 kompostu hosi mane 1.034 no feto 465.
Nune’e iha loron kuarta (07/07) autoridade RAEOA kontinua lansa-tan vasina Sinovac hamutuk vial 200 ba sidadaun Xineza 65 no Timor-oan 135, nomós kontinuasaun vasina AstraZeneca ba komorbilidade idade 60 iha sub-rejiaun (4) hamutuk vial 570.
Entretantu totál populasaun iha aldeia Manuinpena hamutuk uma kain 250, ho populasaun hamutuk 1.058.
Jornalista : Abilio Elo Nini
Editór : Cancio Ximenes
