OÉ-CUSSE, 22 Jullu 2021 (TATOLI)—Prezidente Autoridade (PA) Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kinta ne’e hala’o fiskalizasaun ba projetu perfurasaun sistema bee-moos iha aldeia Banoco, suku Lalisuk sub-rejiaun Pante Makasar ne’ebé konstrui hosi Programa Nasionál Dezenvolvimentu Suku.
Notísia Relevante: MAE entrega karreta operasionál 16 ba DD-PNDS munisípiu 12-RAEOA
Iha fiskalizasaun ne’e, ekipa ne’ebé lidera hosi Prezidente Autoridade ne’e konsege deteta obra projetu perfurasaun sistema bee-moos ne’e seidauk prenxe kualidade, tanba ne’e nia sujere atu konstrui infraestrutura bázika ba komunidade iha suku no aldeia tenke garante kualidade tuir padraun internasionál,
“Projetu ne’e seidauk hotu. Ita mai observa dala-tolu ona persiza hadi’a. Hadi’a signifika persiza servisu-tan tanba ita haree tanke ne’e sedauk iha standar ho kualidade. Obra ne’e persiza hadi’a fali”. Arsénio Bano informa ba jornalista sira bainhira hamutuk ho Dirasaun Infraestrutura Rejionál (DRI) ho Departementu Servisu Agua Saneamentu (DSAS) hala’o fiskalizasaun ba projetu perfurasaun sistema bee-moos iha aldeia Banoco suku Lalisuk sub-rejiaun Pante Makasar, kinta ne’e.
Maske programa PNDS sentralizadu maibé bainhira konstrui obra ruma iha territóriu rejiaun Oé-Cusse nian, autoridade RAEOA nia hakarak osan estadu uza no gasta ho loloos no gasta ba obra tenke bee-nian ne’e ho kualidade.
“Obra ne’e seidauk hotu. Ita tenke halo revizaun. Ha’u hateten ona ba tékniku sira PNDS nian ho autoridade, persiza hadi’a ka halo foun fali. Importante obra ne’ebé ita halo dura ba tempu naruk,” Autoridade ne’e fó hanoin.
Diretór PNDS RAEOA, Sebastião Tanesi, hateten obra ne’e konstrui ho OJE 2020 ninian liuhosi fundu Reziliénsia Komunitáriu no Rekuperasaun Ekonomia (RKRE). Tanba ne’e, nu’udár responsabél másimu PNDS iha Oé-Cusse, promete sei hadia obra sira no garante sei hatudu kualidade molok halo serimónia entrega ba komunidade.
Obra ne’e, nia dehan, toma ba prosesu ne’e hosi Ekipa Jestaun Suku sira mak kria planu no jere rasik nia orsamentu, no ida-ne’ebé kontrola mak funsionáriu tékniku sira iha sub-rejiaun hodi kontrola ba kualidade.
Entretantu Projetu perfurasaun sistema bee-moos ne’e konstrui iha aldeia Banoco, suku Lalisuk, sub-rejiaun Pante Makasar, ho nia valór kontratu $29,314,63. Ekipa Jestaun Suku hamutuk ho Komunidade mak implementa ho durasaun servisu durante fulan tolu (3), hahú iha 12 janeiru 2021 no projetu ne’e atraza tanba ekipamentu Bomba mak sei importa hosi rai-li’ur (Indonézia).
Jornalista : Abilio Elo Nini
Editór : Cancio Ximenes
