DILI, 22 jullu 2021 (TATOLI)—United Nations Development Programme (UNDP) entrega fasilidade projetu ‘Coastal Resilience Building’ ba Ministériu Agrikultura no Peska (MAP) hafoin ramata projetu, ne’ebé antes ne’e hala’o durante tinan-hitu no implementa iha munisípiu 11.
“Konkordánsia iha dokumentu, bainhira projetu hotu, sasán sira-ne’e tenki entrega ba Governu liuhosi Ministériu Agrikultura no Peska,” Diretór Nasionál Floresta, Raimundo Mau, hateten hafoin seremónia entrega, iha Kampaun UN Caicoli, kinta ne’e.
Fasilidade ne’ebé kompostu hosi kareta tolu, motor hitu, kámara drone rua, ekipamentu eskritóriu, ekipamentu halo telekonferénsia no informátika inklui ekipamentu kail, sosa ho osan projetu no uza durante implementa projetu.
Tanba ne’e, MAP liuhosi Diresaun Jerál Floresta sei kordena ho Diresaun Jerál Patrimóniu Estadu inklui Diresaun Nasionál Transporte Terrestre atu kompleta rekezitu molok fasilidade hirak ne’e fila ba propriedade Estadu.
“Sasán sira ne’e hodi apoiu servisu iha área floresta inklui ai-parapa,” nia hatutan.
Diresaun Jerál Floresta nia servisu kontrolu área ai-parapa la’ós iha Dili de’it, maibé iha munisípiu neen suluk.
“Presiza movimentu frekuentemente atu halo monitorizasaun ba ai-parapa iha munisípiu sira. Ita sei haree fasilidade sira ne’e hodi fornese balun ba ekipa atubele kontinua ezerse sira-nia knaar iha munípiu hodi kontrola ai-parapa sira la’o ho di’ak,” Diretór Nasionál dehan.
Iha fatin hanesan, Reprezentante UNDP iha Timor-Leste, Lazima Onta-Bhatta, hateten, projetu ‘Coastal Resilience Building’ hetan apoiu fundu hosi Global Environment Facility ho montante millaun $7.
“Sasán sira ne’ebé ami entrega ho totál $179.00 inklui dokumentu ba MAP,” nia informa.
Jornalista : Natalino Costa
Editora : Julia Chatarina
